DILI, (TATOLI) – Primeiru Ministru, Rui Maria de Araújo informa ba Prezidente Repúblika, Francisco Guterres Lú Olo kona-ba aktu jestaun ne’ebé Governu Jestaun hala’o hela.
“Reuniaun Konsellu Ministru ne’ebé halo iha semana ida ne’e, membru Governu sira kompremetidu nafatin atu hala’o aktu jestaun iha ministériu ida-idak to’o iha loron ne’ebé Governu foun simu pose”, hatete Xefe Governu ba jornalista sira iha Palásiu Prezidente Nicolau Lobato, Bairu-Pité, Dili, kinta ne’e.
Iha biban ne’e, Prezidente Repúblika husu atu Governu Konstitusionál da-neen mantein nafatin serbisu jestaun iha instituisaun sira hotu hodi hein to’o Governu foun simu pose.
Tomada pose ba membru Governu foun adia tanba sei hein tomada pose lejizlatura da-haat ne’ebé sei hala’o iha 5 setembru.
Aleinde ne’e, Primeiru Ministru informa kona-ba manifestasaun ne’ebé estudante sira halo ho ninia konsekuénsia aktu vandalizmu ne’ebé mosu estraga patrimóniu Estadu ninian.
Tuir nia polísia halo atuasaun ne’e tanba atu garante órden públika. Rui afirma polísia la reprime sidadaun nia liberdade atu halo manifestasaun, maibé polísia foti medidas hasoru aktu vandalizmu.
“Ida ne’e responsabilidade polísia nian iha ámbitu ninia misaun atu garante estabilidade iha territóriu Timor laran tomak. Sira ne’ebé pratika aktu vandalizmu no sira ne’ebé asume responsabilidade ba organizasaun manifestasaun ne’e nian, oras ne’e dadauk liuhusi prosesu justisa, polísia detein sira no aprezenta ona ba tribunál hodi deside aktu ne’e sala ka loos”, realsa.
Rui hatutan polísia la’ós foti medida kontra demonstrante sira, maibé foti medida hasoru ema sira ne’ebé pratika aktu vandalizmu.
Jornalista: Xisto Freitas
Editora: Rita Almeida
