DILI, (TATOLI) – Prezidente Partidu Libertasaun Populár (PLP), Taur Matan Ruak, konsidera katak problema polítika ne’ebé oras ne’e akontese iha rai laran ne’e buat ki’ik ida.
“Saida maka ha’u garante ba timoroan sira katak problema ida ne’e ha’u konsidera ki’ik kompara ho problema sira ne’ebé maka liu ona, ha’u fiar katak ita sei ultrapasa problema ida ne’e”, dehan Taur ba jornalista sira iha Palásiu Prezidente Nicolau Lobato, Bairu Pité, lorokraik ne’e, hafoin enkontru ho Prezidente Repúblika, Francisco Guterres Lú Olo, hodi buka solusaun ba problema polítika iha rai laran.
Tuir nia laiha problema ida ne’ebé laiha solusaun. Problema hotu-hotu iha nia solusaun tanba hanoin ida de’it katak estabilidade no dezenvolvimentu maka krusiál ka fundamentál no haktuir mós katak Timor-Leste enfrenta problema barak maibé sempre hakat liu.
Nia esplika solusaun ba problema iha rua de’it maka polítika no legál (konstitusionál). Polítikamente, nia dehan, komplikasaun ona tanba evolusaun hosi partidu opozisaun ne’e la’o maka’as ona no segundu maka dalan legál.
“Aspeitu polítika ne’e mínimu loos maibé la signifika katak laiha ona espasu atu ko’alia”, líder másimu PLP tenik.
Maske nune’e, eis líder rezisténsia ne’e informa desizaun ba problema polítika iha rai laran ne’e iha Prezidente Repúblika nia liman.
“Ami, Aliansa Maioria Parlamentár, iha tempu tuir mai sei fó ami nia opiniaun maibé desizaun ne’e iha Prezidente nia liman”, afirma.
Iha biban ne’e, Taur agradese Prezidente Repúblika ne’ebé kontinua konvida sira hodi rona sira nia opiniaun hodi buka solusaun ba problema hirak ne’ebé iha no agradese mós ba komunidade, estudante no traballadór sira tanba hotu-hotu mantein nível serinidade no kalma.
“Ha’u husu ba timoroan tomak atu kontinua hatudu komportamentu ida ne’e hodi hatudu ba mundu katak maske timoroan sira diferensa ideia no problema maibé mantein hakmatek”, sujere.
Jornalista: Xisto Freitas
Editora: Rita Almeida
