iklan

POLÍTIKA

Matéria Kampaña PD Hanesan ho FRETILIN

Matéria Kampaña PD Hanesan ho FRETILIN

Símoblu Partidu Demokrátiku.

DILI, (TATOLI) – Xefe Bankada Partidu Demokrátiku (PD), Maria Teresa Gusmão, hateten PD sei la’o mesak iha eleisaun antesipada maibé matéria kampaña hanesan partidu Frente Revolusionária Timor-Leste Independente (FRETILIN).

“Koligasaun ka la’e ba eleisaun antesipada prefere liu PD la’o mesak maibé matéria kampaña la’o ida de’it hanesan FRETILIN ba ho governu dahituk ninia programa no Planu Estratratéjiku Dezenvolvimentu Nasionál (PEDN) ne’ebé durante ne’e ita hala’o ona”, tenik ba jornalista sira iha Parlamentu Nasionál (PN), ohin.

Maske pozisaun PD la’o mesak maibé koligasaun ho FRETILIN iha governu dahituk ida agora metin nafatin.

Hodi hatutan desizaun PD ne’ebé la’o ketak maibé desizaun ne’ebé boot liu PD sei hala’o konferénsia iha tempu badak hodi konferensista sira foti desizaun oinsá pozisaun PD nian iha eleisaun antesipada.

Kona-ba bankada opozisaun (CNRT, PLP no KHUNTO) ne’ebé foin lais asina plataforma ho naran Aliansa Mudansa ba Progressu (ANP) nia desizaun avansa ho lista únika ba eleisaun antesipada, tuir nia la sai ameasa tanba desizaun iha povu nia liman.

“Ita bele ko’alia no halo programa hotu maibé durante fulan neen iha inserteza nia laran, povu hatene ona no haree ho matan no rona ho tilun oinsá koligasaun ho AMP nia pozisaun ne’ebé foti hodi tane Nasaun ninia soberania no povu ninia terus no sakrifísiu tomak. Tanba ne’e, povu sei hili partidu tuir sira nia matan, tilun no tuir sira nia fuan ne’ebé sira sente”, katak.

Antes ne’e iha loron 13 setembru 2017, partidu koligasaun rua ne’e (FRETILIN no PD) asina akordu koligasaun hodi forma governu dahituk.

Partidu Kmanek Haburas Unidade Nasionál Timoroan (KHUNTO) ne’ebé deside la partisipa iha akordu koligasaun ho razaun seidauk konsege rezolve problema interna iha partidu laran.

Bankada koligasaun konsege hetan kadeira 30 iha Parlamentu Nasionál maské ho minoria, kompara ho bankada opozisaun ne’ebé hetan kadeira maioria hamutuk 35.

Prezidente Repúblika dekreta ona eleisaun antesipada sei akontese iha loron 12 fulan-maiu tinan ne’e.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!