SUAI, (TATOLI)-Pacific Angel 2018, kompostu husi militár Estadu Unidu Amérika (EUA), Falintil-FDTL (Forsa Defeza Timor-Leste), Forsa Austrália, inklui Forsa Médika husi TNI (Tentara Nasional Indonésia) komponente áerea, hala’o programa saúde jerál, dentária (nehan), oftamolojia (matan), pediátriku no enjeñaria ba komunidade Suai.
“Ami kontente serbisu hamutuk ho forsa militár Timor-Leste nian. Ami espera katak imi sei dezfruta (enjoy) saida mak imi haree,” informa komandante misaun Pacific Angel 2018, Letnan Kolonel Catherine Grush, ba jornalista sira iha postu administrativu Suai vila, munisípiu Kovalima, sesta ne’e.
Nune’e mós, lider eskuadra forsa áerea Australiana, Evelyn Wright, nu’udar médika saúde públika mós demonstra nia sentimentu ksolok katak kontente tebes serbisu ho forsa timoroan sira. Alende ida ne’e, nia konsidera katak durante sira-nia prezensa iha Timor-Leste komunidade, liliu iha Suai “Bemvindo” tebes ba sira.
Husi F-FDTL, Kapitaun Adelino Vilela, nu’udar pontu fokál diriji Pacific Angel 2018, esplika ezersísiu Pacific Ange ne’e ezersísiu multilateral ne’ebé hala’o kada tinan rua-rua, hamutuk ho nasaun parseiru barak.
“Maibé tinan ida ne’e partisipa de’it nasaun parseiru na’in lima, efetivu barak liu ne’e, primeiru husi Amérika, segundu Timor-Leste, terseiru forsa áerea Austrália ninian, kuatru Indonézia, pois kintu Filipina; ema ida de’it,” informa Kapitaun Vilela.
“Ezersísiu Pacific Angel nia objetivu loloos ne’e hanesan nasaun sira hamutuk apoiu hodi fó tratamentu médiku nomós atividade enjeñária; halo rehabilitasaun sentru komunidade sira, klínika sira ne’ebé mak iha Suai,” Nia hatutan.
Operasaun asisténsia umanitária Pacific Angel iha Suai, Ajénsia TATOLI observa katak komunidade sira, labarik to’o adultu, ferik no katuas entuziasmu tebes hodi mai halo konsulta saúde gratuita no hetan asisténsia médika husi ekipa saúde militár kontijente Pacific Angel.
Kontijente ne’e hetan mós apoiu husi voluntáriu CVTL (Cruz Vermelha Timor-Leste), profisionál saúde munisípiu Covalima, profesór eskola sekundária públika nú. 01. Seran Kote, Suai, Organizasaun lokál, inklui Polísia Nasionál Timor-Leste (PNTL) nomós F-FDTL nune’e mós médiku forsa áerea TNI (Tentara Nasional Indonesia).
Jornalista: Rafy Belo
Editora: Rita Almeida
