DILI, (TATOLI) – Sekretáriu Estadu Kooperativa, Arsénio Pereira da Silva, konsidera povu mak nain ba dezenvolvimentu, tanba ne’e sei halo servisu barak liu iha área rurál, oinsá dezenvolve kooperativa iha parte agrikultura nian.
“Tanba ita atu dezenvolve povu iha área rurál la’ós iha kapitál, entaun ha’u orienta ona katak serbisu ida ne’e aban-bainrua husi diretór nasionál sira to’o mai funsionáriu sira tenke serbisu ho komunidade iha kampu”, katak nia iha Bebora, ohin.
Arsénio akresenta fulan ida iha semana haat, semana ida mak iha edifísiu para halo serbisu administrasaun nian, restu tenke serbisu iha kampu, tanba ita serbisu atu serbí povu iha baze, la’ós iha edifísiu de’it.
Governante ne’e argumenta edifísiu fatin atu fasilita serbisu administrasaun nian, tanba ne’e prezensa sekretáriu Estadu no funsionáriu sira ho komunidade iha área remota importante tebes.
“Ita-nia prezensa hodi serbisu hamutuk ho sira iha ne’ebá bele enkoraja sira no bele halo interasaun direta ho komunidade ne’ebé sai na’in ba dezenvolvimentu. Tanba ne’e maka iha polítika ha’u-nia depois ami mós hetan orientasaun husi Primeiru-Ministru katak funsionáriu barak ne’e tenke serbisu direta ho komunidade, labele serbisu iha edifísiu, se larezulta buat ruma, tanba Governu ida ne’e hakarak Governu ida ne’ebé iha rezultadu, ne’ebé bá oin tenke hatudu rezultadu”, katak.
Nune’e serbisu Sekretáriu Estadu Kooperativa barak liu sei halo iha terrenu, tanba hakarak atu hamoris kooperativa liuliu kooperativa produsaun oinsá bele prodús no halo koordenasaun ho ministériu relevante hodi halo serbisu sira.
“Kooperativa ne’e pilár ida iha área ekonomia nian no ha’u-nia programa ne’e bá terrenu oinsá hamutuk ho sira para iha umakain sira ne’e bele hasa’e sira-nia ekonomia, tanba maioria povu ne’e husi remota no serbisu iha agrikultura, peska, maibé agrikultura ho peska sei iha tradisionál no subsisténsia seidauk halo produsaun barak entaun prezensa ami-nian bele enkoraja para ida subsisténisa ne’e bele bá merkadu lokál”.
Arsénio akresenta tan kooperativa iha Timor-Leste ne’ebé rejistadu ne’e hamutuk 191, maibé iha 40 mak la’o.
“Ida ne’e dadus tanba ha’u seidauk bá haree diretamente entaun hira mak la’o no lala’o seidauk hatene, depois kooperativa iha agríkola ida de’it, mas realidade grupu kamponeze, grupu agrikultór, peskadór sira eziste hanesan grupu ki’ik no hanesan eventuál katak forma grupu sira tanba iha apoia ruma husi Governu ou ajénsia, mas depois ida ne’e hotu grupu ne’e ida-idak la’o ninian no ladún iha kontinuasaun”.
Jornalista: Maria Auxiliadora
Editora: Rita Almeida
