DILI, (TATOLI) – Primeiru-Ministru, Taur Matan Ruak, hatete nia seidauk baruk atu ko’alia kona-ba lista membru Governu na’in sia ne’ebé pendente to’o hetan solusaun no Prezidente Repúblika mós kontinua disponível ba asuntu ne’e.
Nia dehan substituisaun ka lae ba ema na’in sia ne’e la’ós nia desizaun mesak, tanba Governu ida ne’e sustenta hosi partidu lima iha Aliansa Mudansa ba Progresu (AMP), tanba ne’e maka tenke halo entendementu ho AMP.
“Ha’u jere ekipa hosi CNRT, PLP, KHUNTO no ema independente sira”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin soru-mutu ho Prezidente Repúblika, Francisco Guterres Lú Olo.
En-prinsípiu, Taur tenik, iha difikuldade liu-liu ba membru Governu seidauk kompletu maibé iha ema atu halo kobertura ba ministériu sira ne’ebé maka ministru sira seidauk toma pose no buat hotu la’o di’ak, tanba ne’e maka Parlamentu aprova orsamentu no haruka ona ba Prezidente Repúblika atu promulga.
“Sente falta maibé dadaun ne’e halo hela kobertura tuir rekursu ne’ebé iha para funsiona mákina Estadu”, nia afirma.
Jornalista: Xisto Freitas
Editora: Rita Almeida
