DILI, (TATOLI) – Primeiru-Ministru, Taur Matan Ruak, ho Prezidente Parlamentu Nasionál, Arão Noe de Jesus, ohin hasoru malu hodi diskute polítika rai laran no prosesu promulgasaun Orsamentu Jerál Estadu (OJE) 2018 hosi Prezidente Repúblika, Francisco Guterres Lú Olo.
ʺHasoru malu ne’e hodi haree lalaok polítika to’o ohin loron, faktu mós ita sei hein hela orsamentu ne’ebé seidauk promulgaduʺ, katak Ministru Reforma Lejislativa no Asuntu Parlamentár, Fídelis Magalhaẽs, ba jornalista sira iha uma fukun, ohin.
Funsionamentu makina Estadu depende ba orsamentu, tanba ne’e Governu ne’ebé lidera hosi Taur Matan Ruak espera Xefe Estadu bele promulga lalais OJE 2018.
ʺIta hotu hein atu bele iha promulgasaun iha tempu badak, nune’e finansia makina estadu, liuliu pagamentu sira no kobertura ba nesesidade povu nian”, akresenta.
OJE 2018 mós parte ida atu normaliza situasaun ekonómia no prosesu dezenvolvimentu iha rai laran.
Prezidente Repúblika oras ne’e estuda hela proposta lei OJE 2018 ho montante billiaun $ 1.2 ne’ebé aprova ona hosi Parlamentu Nasionál.
Tuir artigu 85 konstituisaun, Prezidente Repúblika iha direitu atu estuda kona-ba lei ruma hosi orgaun lejislativa ho tempu loron 30, hahú hosi loron simu nian.
Jornalista: Agapito dos Santos
Editora: Rita Almeida
