Prezidente Parlamentu Submete Ba Desizaun Partidu

DILI (TATOLI)—Prezidente Parlamentu Nasionál, Arão Noé de Jesus, hateten maski hanesan Prezidente Parlamentu maibé tenke submete ba dixiplina partidária ne’ebé regulariza iha Lei Eleitorál artigu 14.

“Lei Eleitorál artigu 14 hateten bainhira deputadu ne’ebé la kumpre dixiplina parlamentár bele hetan recall,” Arão ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho argumentu ne’ebé viral iha públiku katak Prezidente Parlamentu mós vota kontra Prezidente Repúblika nia viajen traballu ba Nova Iorke.

Nia klarifika, labele dehan nia ba tiha hanesan Prezidente Parlamentu tan ne’e nia ema independente, ne’e persepsaun sala.

Liuhusi enkontru ho Prezidente Repúblika, Arão haktuir, nia hato’o ona ninia pozisaun vota ba Prezidente katak ne’e situasaun polítika no desizaun polítika ne’ebé nia hanesan pertense ba partidu ka bloku ida.

Nia mós hateten, Parlamentu la autoriza Xefe Estadu ba Nova Iorke tanba ne’e separasaun podér.

 “Hakarak informa ba Prezidente katak ne’e desizaun Parlamentu nian tanba órgaun ida iha nia kompeténsia rasik tuir konstituisaun, nune’e ida-idak ezekuta nia kompeténsia.”

“Ha’u hanesan Prezidente Parlamentu mai informa de’it saida maka akontese tiha ona ba Prezidente Repúblika, tanbasá ne’e akontese, oinsá desizaun,” Arão esplika.

Jornalista: Xisto Freitas

Editór : Manuel Pinto