Kriminaliza Ema Halo Difamasaun

DILI (TATOLI) – Deputadu Bankada Fretilin, Antoninho Bianco husu atu revee fila fali lei difamasaun, tuir nia lei ne’ebé iha la kriminaliza ema halo difamasaun maibé prosesu hanesan kazu sivíl.

“Ha’u mós hanoin ita nia rai lori ema rihun ba rihun nia mate, ema mete lider istóriku sira ohin loron kuaze iha públiku ne’e hanesan fali la vale liu. Buat balun ita tenke haree tanba  prezervasaun lider istóriku ha’u hanoin importante, tanba  hanesan kapitál ba prosesu ida ne’e. Tanba  sá mak ita la-revee lei ida uluk difamasaun ne’e labele ba kazu sivíl, di’ak liu kriminaliza tanba  ida ne’e la’ós halimar”, Bianco levanta iha iha plenária ohin.

Nia dehan, ohin loron ita rona ema sira hanesan fundadór, lutadór, no ukun na’in sira sai hanesan la vale ona. “Se hanesan ne’e Prezidente, ema hanesan ita atu vale tan saida? no jerasaun oin mai ne’e atu vale tan saida? Se ema sira hahú situasaun sira, agora ema tolok arbiru, ita sira ne’e atu saida tan? Ha’u ho ita boot lae liu satán jerasaun mai.

Tanba  ne’e tuir antigu deputadu ne’e, presiza  hanoin buat balun ne’ebé tenke kriminaliza di’ak liután para fó k’bit ba Ministériu Públiku no Polísia sira atu bele atua aktu hirak ne’e em nome de estadu.

Ita uza fali hanesan ema sira iha Amérika, Austrália no rai seluk dehan ita lori ema sira ne’e tama kazu sivíl no lori ba Tribunál para sira lakon karik ita sai riku kedan, ne’e lalika mehi iha Timor.

Uluk hahú kedan elabora Lei Difamasaun, tuir los kriminalizasaun ba difamasaun ne’ebé hanesan Konstituisaun hatete, maibé to’o ikus lei ne’e dehan ba kazu sivíl.

Tanba  ne’e di’ak liu kazu ne’e tenke konsensu atu hare fali buat ida ne’e, prezervasaun ne’e importante ba lider no luta na’in sira no mós ba aban bain rua.

Hatán ba kestaun ne’e, Ministru Reforma Lejizlativa no Asuntu Parlamentár, Fidelis Leite Magalhães ne’ebé marka prezensa iha plenária hateten atu bele kriminaliza difamasaun husi parte governu nia opiniaun, PN mak iha podér atu lejizla no bele halo diskusaun konaba lejizlasaun no projetu lei ida.

“Parte governu nian atu fó hanoin katak importante tebes maski iha asuntu barak mak ita boot sira levanta konaba difamasaun, maibé importante tebes atu labele loke dalan para lei ida ne’e hamate demokrasia iha futuru”, nia fó hanoin ba deputadu sira.

Jornalista: Julia Chatarina

Editór : Manuel Pinto