DÍLI, (TATOLI)-Lider timoroan, José Ramos Horta esplika, diversidade la’ós ameasa ba unidade nasionál maibé hanesan rikeza ida. Importante mak iha polítika inkluziva. Katak, polítika ne’ebé hamosu ekilibru ekonómiku, sosiál, distribuisaun rikeza ne’ebé justa no ekuititiva, iha sosiedade multiétnika, multirelijioza no la iha ema ida sente eskluídu iha nia país rasik.
“Diversidade étnika, kulturál, relijioza, linguístika iha país ida ne’e, nu’udar rikeza ida, la’ós haree ida ne’e hanesan fali ameasa ida ba unidade nasionál,” laureadu prémiu Nobel da Paz, José Ramos Horta ba akadémiku sira, iha Kampus Sentrál Universidade Nasionál Timor Lorosa’e (UNTL), ohin.
“Infelizmente nasaun barak iha mundu falla ida ne’e,” konsidera eis-prezidente repúblika, José Ramos Horta hodi reforsa, haree ba konsiderasaun nasaun sira iha mundu ligadu ho diversidade ne’e, ne’ebé iha tendénsia ba hamosu konflitu.
Tanba ne’e, tuir laureadu nobel da paz timoroan ne’e katak prevensaun konflitu mak inkluzaun ema hotu iha aspetu hotu, sosiál, ekonomia, kultura no seluk tan la haree ba rasa, etnia, relijiaun no lian.
“Finalmente direitu ba auto-determinasaun mak haree ba buat sira ne’e hotu,” hateten lider timoroan, José Ramos Horta ba akadémiku sira iha UNTL bainhira sai oradór ba konferénsia ho tema Direito dos Povos à Autodeterminação e Direito da Resistência.
“Konsagra indepedénsia, efikaz estadu, livre i demokrátiku ne’ebé mak responde ba mehi, espetativa sidadaun idaidak nian no moris nu’udar dignidade umana. Se indepedénsia mak la iha ekilibru sosiál no inkluzaun, entaun sei trai indepedénsia ne’e rasik,” konklui laureadu prémiu Nobel da Paz, José Ramos Horta.
Jornalista: Rafy Belo
Editór : Manuel Pinto
