DILI, (TATOLI) – Governu Timor-Leste, liuhusi Ministériu Negósiu Estranjeiru no Kooperasaun (MNEK) entrega ona apoiu solidaridade ba vítima rai nakdoko no Tsunami, iha Palu, Sulawesi-Indonézia, liuhusi embaixada Indonézia iha Timor-Leste ho xeke montante dolár amerikanu rihun 750.
Apoiu umanitáriu ne’e entrega husi MNEK, reprezenta diretór Asuntu Sudeste Áziatiku no Oseania, Lisualdo Gaspar, no simu husi embaixadór Indonézia iha Timor-Leste, Sahat Sitorus, akompaña husi sekretária daruak embaixada Indonézia, Novita Supit.
“Ohin Ministériu Negósiu Estranjeiru no Kooperasaun selebra serimónia simples ida hodi entrega simbolikamente ajuda umanitáriu husi governu Timor-Leste ba governu Indonézia, ba vítima sira ne’ebé afetadu rai nakdoko no tsunami iha Sulawesi ho montante totál sete centos cinquenta mil (750. 000) dolár hanesan jestu ita-nia solidariedade ba sira”, katak diretór Asuntu Sudeste Áziatiku no Oseania, Lisualdo Gaspar, ba TATOLI iha MNEK-Praia dos Coqueiros, ohin.
Iha fatin hanesan, embaixadór, Sahat Sitorus, hodi estadu, governu no povu Indonézia tomak agradese Timor-Leste tanba lider, nasaun no povu nia orasaun, atensaun, apoiu ba Indonézia, liuliu ba família ne’ebé afeta husi rai nakdoko no tsunami, iha Dongala no Palu.
Agora sei iha faze rekuperasaun to’o loron 26 outubru no rekonstrusaun sei tuir mai, karik sei presiza tinan rua ka tolu mai tan. “Ha’u garante katak ho ajuda ne’e; boot husi governu Timor-Leste, 750.000 la’ós valór ida ne’ebé ki’ik no ha’u sente katak ida ne’e hatudu duni belun besik”, tenik Sahat Sitorus.
Nia mós dehan prezidente Indonézia, Jokowi Widodo, simu ona karta solidariedade husi Primeiru-ministru, Taur Matan Ruak, inklui mós husi Prezidente Parlamentu Nasionál (PN) no entidade seluk tan.
“Dala ida tan, hodi estadu, governu no povu Indonézia nia naran hato’o obrigadu ba Timor-Leste”, konklui Sahat Sitorus.
Antes ne’e, governu Timor-Leste fó mós apoiu solidariedade ba Indonézia, bainhira akontese rai nakdoko iha Lombok, 29 jullu, ho montante dolár rihun 750.000 mós ho hetan aprovasaun husi Konsellu-ministru, inklui mós agora.
Jornalista: Rafy Belo
Editora: Rita Almeida
