DILI (TATOLI)—Grupu Loriku Load ho motorizada sei hale’u Timor hahú hosi segunda ne’e (12/11) tuku 12: Otl to’o iha 28 Novembru, ho objetivu atu komemora Masakre Santa Kruz ba dala 27.
Grupu refere aranka ho rute ba dahuluk Dili-Suai, hafoin sira komemora Masakre Santa Kruz ba dala 27 iha Semitériu Santa Kruz hamutuk ho mate restu sira, autoridade nasionál no timoroan sira seluk.
Responsável Grupu Loriku Load, Nelson Turquel, hateten viajen ida ne’e hanesan meius ida atu vizita komunidade iha área remota no aumezmu tempu sosializa istória 12 Novembru ba ema hotu-hotu hanesan omenájen ba joven sira ne’ebé mate iha loron ne’ebá nomós mate restu sira ne’ebé mantein memória akontesementu ida ne’e.
“Durante viajen hale’u Timor, Load mós sei ba vizita no halo soru-mutu ho komunidade, vizita rate vítima Masakre Santa Kruz iha foho ne’ebá, hasoru malu ho mate restu iha área remota, fahe istória kona-ba akontesementu 12 Novembru no loke filme sligth show kona-ba Masakre Santa Kruz nian,” nia esplika.
Nia hatutan Load mós sei halo filme dokumentáriu ida kona-ba viajen ida ne’e no sei entrega filme ne’e ba Komité 12 Novembru.
“Eventu ida ne’e hanaran ‘Dalan Ba Memória’ tanba akontesementu 12 Novembru ne’e labele lakon. Ita nu’udar mate restu no nu’udar sasin tenke prezerva ita nia istória,” nia tenik.
Grupu ne’e harii hosi joventude mate restu ho nia objetivu atu halo viajen oi-oin iha Timor laran tomak, iha ne’ebé dalaruma liuhusi dalan-boot no dala barak liuhusi dalan tuan ne’ebé beila sira husik hela, ho objetivu atu promove fatin kulturál, fatin istóriku, turistiku no sagradu.
Hanesan manu Loriku ne’ebé semo lemorai, Turque informa, Load mós sei semo lemorai hodi haree no deskobre katak Timor nu’udar fatin ida furak no fatin seguru.
Durante viajen, nia haktuir, sira hela iha komunidade nia leet hodi halo serbisu komunitáriu hanesan fahe livru no materiál eskola nian.
Jornalista: Xisto Freitas
Editór : Manuel Pinto
