DILI, (TATOLI) – Tuir ajenda plenária estraordinária kuarta ne’e, Parlamentu Nasionál (PN) sei halo diskusaun no votasaun ba assentimentu (konkordansia) deslokasaun Prezidente Repúblika (PR), Francisco Guterres Lú Olo, ba Reino Marrocos, maibé Xefe Estadu deside kansela ho razaun atu akompaña debate Orsamentu Estadu.
“Prezidente Repúblika deside la efetua vizita ne’e, tanba ajenda interna ne’ebé labele adia hanesan asuntu Orsamentu Jerál Estadu (OJE) 2019”, refere karta husi Gabinete Prezidénsia Repúblika ba plenária, ohin.
Vizita Reino Marrocos ne’e iha atu akontese loron 7 to’o 14 dezembru, hodi hatan konvite husi Sekretáriu Jerál Organizasaun Nasoen Unida (ONU), António Guterres, atu partisipa enkontru altu nivel Global Compact, ne’ebé sei realiza iha loron 10 to’o 11 dezembru.
Jornalista: Julia Chatarina
Editora: Rita Almeida
