Top

Parlamentu Aprova Miloens $1.1 Ba Organizasaun Rezisténsia

Primeiru-Ministru hamutuk ho ninia membru sira iha debate proposta lei OJE 2019, iha uma fukun. Imajen António Goncalves

DILI (TATOLI)—Parlamentu Nasionál, kinta ne’e, aprova ona proposta nú. 9 ne’ebé propoin orsamentu Miloens $1.1 atu apoiu ba organizasaun rezisténsia sira hanesan OJETIL, RENETIL, FITUN no OPJELATIL. Aprovasaun ba proposta ne’e ho votus afavor 61, kontra 1 no abstensaun 2.

Orsamentu refere sei sai hosi Fundu Susiedade Sivíl  iha Gabinete Primeiru-Ministru nia okos ne’ebé hetan alokasaun orsamentu ho montante Miloens $4 resin hosi orsamentu Jerál Estadu 2019.

Proponente ba proposta apoiu organizasaun rezisténsia maka hanesan deputadu António da Conceição hosi bankada PD, deputadu Marito Mota no David Diaz Ximenes “Mandati” hosi bankada FRETILIN.

António da Conceição, proponente hosi proposta ne’e hateten apoiu organizasaun ne’e ho intensaun atu promove partisipasaun populasaun iha prosesu dezenvolvimentu, aumezmu tempu hametin ukun rasik án ne’ebé agora dadaun ne’e ema hotu hakarak tebes timoroan sira moris iha unidade .

Atu moris iha unidade, tuir nia, presiza edukasaun sívika no edukasaun sidadania ne’ebé maka maka’as no mais adekuadu bainhira organizasaun rezisténsia maka atu halo edukasaun ne’ebé mensionadu.

Aleinde ne’e, deputadu Marito Mota reforsa tan katak juventude rezisténsia barak lakon sira nia estudu tanba iha tempu ne’ebá (okupasaun Indonézia) soe sira nia tempu hodi luta ba libertasaun nasionál, entaun, sira halo proposta ida ne’e atu bele kria atividade ba joven hirak ne’e para kapasita sira liuhusi edukasaun naun formál.

Iha biban ne’e, Primeiru-Ministru, Taur Matan Ruak, deklara katak nia apoiu proposta ida ne’e maske Governu seidauk estabelese kritéria ida klaru oinsá atu bele apoiu organizasaun, maibé kompromete iha tinan oin sei halo serbisu (estabelese kritéria) para bele apoiu organizasaun rezisténsia sira tuir dalan ne’ebé loos no dignu.

Proposta nú. 9 ne’e nu’udar proposta kontinuidade hosi debate orsamentu jerál Estadu 2018 ninian, iha ne’ebé altura ne’ebá Primeiru-Ministru konkorda maibé tanba seidauk iha posibilidade entaun prevé ba orsamentu jerál Estadu 2019.

Entretantu, deputada bankada FRETILIN, Josefa Soares, deputadu bankada PLP, Francisco de Vasconcelos no deputada Bisoi hosi bankada CNRT husu Governu atu  difini kritéria apoiu orsamentu nune’e labele halo diskriminasaun ba organizasaun rezisténsia sira seluk hanesan Dewan Solidaritas Mahasiswa, Organizasaun Populár Muller Timor (OPMT) no organizasaun foun hanesan Jerasaun Patriota nomós organizasaun rezisténsia sira seluk.

Maibé, proponente ba proposta nú. 9, deputadu Marito Mota klarifika katak organizasaun haat (OJETIL, RENETIL, FITUN no OPJELATIL) ne’e reprezenta de’it maibé la signifika organizasaun haat ne’e mesak maka atu hetan apoiu orsamentu.

Nia hatutan, organizasaun rezisténsia sira seluk sei hetan hotu orsamentu balun hosi montante orsamentu ne’ebé mensiona iha leten nune’e bele dezenvolve sira nia atividade organizasaun.

Jornalista: Xisto Freitas

Editór : Manuel Pinto

Publisidade

Leave a Reply

Latest Post

error: Content is protected !!