iklan

NASIONÁL, JUSTISA, POLÍTIKA

PJR Relata Mudansa Pozisaun iha Ministériu Públiku

PJR Relata Mudansa Pozisaun iha Ministériu Públiku

Prokuradór Jéral Repúblika (PJR), José da Costa Ximenes.

DILI (TATOLI)—Prokuradór Jerál Repúblika (PJR), José da Costa Ximenes, relata mudansa pozisaun iha Ministériu Públiku ba Xefe Estadu, Francisco Guterres Lú Olo, iha Palásiu Prezidente Nicolau Lobato, Bairru Pité, segunda ne’e.

Nia haktuir, hafoin tomada pose adjuntu Prokuradór Jerál Repúblika, Afonso Lopez, iha 4 Dezembru,  kargu Prokuradór Distritál Dili mamuk tanba atuál Adjuntu Prokuradór Jerál antes ne’e hanesan Xefe Prokuradór Dili, entaun iha 6 Dezembru, Konsellu Superiór Ministériu Públiku desidi hodi nomea Dr. Jacinto Soares Babo ba kargu Prokuradór Distritál Dili.

Nia hatutan Konsellu Superiór Ministériu Públiku mós iha loron 6 Dezembru deside no delibera hodi nomea Dra. Remegia de Fátima hodi sai hanesan Prokuradór Repúblika Distritál Baucau hodi troka Dra. Ivonia Guterres ne’ebé transferida ona mai Prokuradoria Distritál Dili.

Ximenes hateten Konsellu Superiór Ministériu Públiku mós desidi no delibera nomea Xefe Prokuradór foun ba Prokuradoria Repúblika Distritál Suai, tanba antigu Xefe Prokuradór Repúblika Distritál Suai sei termina nia serbisu iha 31 Dezembru no só iha Oe-Cusse maka Konsellu desidi hodi extende tan Komisaun Serbisu ba Dr. Mateus Nesi ba tinan tolu.

Aleinde ne’e, Prokuradór Jerál tenik, iha 6 Dezembru liu-ba, Konsellu mós desidi hodi nomea eis Adjunta Prokuradora Jerál Repúblika, Zélia Trindade, asumi kargu inspetora hodi reforsa serbisu inspesaun iha Ministériu Públiku.

Nia mós dehan iha inísiu janeiru 2019, Ministériu Públiku sei halo retiru anuál ho objetivu atu halo avaliasaun ba serbisu sira hotu ne’ebé halo iha Ministériu Públiku durante tinan ida no aumezmu tempu prepara pasu ka objetivu ba tinan 2019 nian katak saida maka presiza hadi’a no halo.

Nia salienta katak Konsellu Superiór Ministériu Públiku mós sei halo retiru iha loron 25 Janeiru 2019 hodi haree planu serbisu inspesaun Ministériu Públiku ba tinan 2019 nian no serbisu sira seluk ne’ebé tama iha kompeténsia Konsellu ninian.

Entretantu, Ximenes haklaken, Prokuradoria Jerál mós desidi ona hodi fó delegasaun kompeténsia área tolu ba adjuntu prokuradór jerá founl, primeiru, atu tau matan ba serbisu Gabinete Sentrál Kombate Korrupsaun no Kriminalidade Organizada. Segundu, delega kompeténsia iha área kooperasaun internasionál ninian no terseiru tau matan ba orsamentu Prokuradoria Jerál Repúblika.

Iha biban ne’e, Xefe Estadu hateten nia fó konfiansa totalmente ba Ministériu Públiku para atua tuir lei ne’ebé maka iha no konta ho apoiu Prezidente Repúblika ninian institusionalmente no pesoalmente ba serbisu Ministériu Públiku.

Jornalista: Xisto Freitas

Editór : Manuel Pinto

iklan
iklan

Leave a Reply

iklan
error: Content is protected !!