PN Hato'o Hikas Proposta OJE 2019 Ba PR

DILI, (TATOLI) – Prezidente Parlamentu Nasionál (PN), Arão Noe, hatete PN hato’o hikas proposta Orsamentu Jerál Estadu (OJE) 2019 ne’ebé hetan ona reapresiasaun hosi parlamentu.
“Redasaun finál iha komisaun C hotu ona, ohin dadersan sira submete mai no ha’u halo ona asinatura, ohin ha’u haruka tékniku sira prepara dekretu foun hodi haruka ba Prezidente Repúblika, ohin”, Arão Noe ba jornalista sira iha parlamentu, ohin.
Promulga ka la’e, lider másimu parlamentu dehan ne’e kompeténsia Xefe Estadu, Francisco Guterres Lú Olo nian, enkuantu ida ne’e dekretu foun, tanba ne’e mak nia analiza durante loron 30 nia laran hafoin foti desizaun. Hanesan mós konstituisaun fó prazu loron 90 maibé la to’o semana ida parlamentu reapresia fila fali, tanba nesesidade Estadu nian.
Tuir lider parlamentu orsamentu mak ran Estadu nian, la iha orsamentu, Estadu sei labele moris, nune’e mak parlamentu fó prioridade ba OJE hodi aselera lais.
“Horseik halo reapresiasaun ba OJE 2019 no halo alterasaun balun. Nune’e mak osan tun ona ba billiaun $1.482, promulga ka la’e, veta ka la’e, kompeténsia Prezidente Repúblika”, haktuir.
Se Xefe Estadu veta, tenke rekore ba tribunál atu haree konstitusionalidade ka la’e, ida ne’e kompeténsia ninian.
Enkuantu, proposta lei númeru 4/V, OJE 2019 hamutuk billiaun $2,132, maibé iha reapresiasaun parlamentár konsege redú milliaun $650 atu sosa asaun ConocoPhillips ho Shell, entertantu saldo totál ne’ebé parlamentu apresia hamutuk billiaun $1,482.
Jornalista: Zezito Silva
Editora: Rita Almeida

