PR Promulga OJE 2019

DILI (TATOLI)—Prezidente Repúblika (PR), Francisco Guterres Lú Olo, ohin (Kinta-red) ne’e iha Palásiu Prezidente Nicolau Lobato, Bairru Pité, promulga ona Dekretu Parlamentu Nasionál Nú. 5/V kona-ba orsamentu jerál Estadu (OJE) 2019 ne’ebé antes ne’e hetan reapresiasaun hosi Parlamentu Nasionál.
Prezidente Repúblika sei hato’o nia analiza profunda ba Lei Orsamentu Jerál Estadu 2019, relasiona ho analiza vizaun médiu no longu prazu no situasaun oioin iha loron hirak tuirmai.
Prezidente Repúblika simu reapresiasaun OJE 2019 hosi Parlamentu Nasionál iha 1 Fevereiru 2019 ho montante biliaun $1.482 hosi proposta inísiu biliaun $2.1.
Iha reapresiasaun ba OJE refere, hasai tiha ona orsamentu ho montante millaun $650 ho razaun katak alokasaun ne’e kontempla ona iha Lei Atividade Petrolíferu (LAP).
Tuir informasaun ofisiál ne’ebé Ajénsia Tatoli asesu hosi Mídia Prezidénsia Repúblika katak promulgasaun ne’e bele fó sai de’it liuhusi komunikadu imprensa no la obrigatóriu tenke fó sai hosi konferénsia ba imprensa.
Jornalista: Xisto Freitas
Editór : Manuel Pinto

