Top

Governu Sei Defini Kritéria Regula Arte-Marsiál

Primeiru-Ministru, Taur Matan Ruak. Imajen Antonio Goncalves

DILI, (TATOLI) – Governu halo esforsu hotu para oinsá bele hadi’a mekanizmu ka regulamentu para viabiliza intensaun ida ne’e.

“Naturalmente opiniaun ida ne’e kuaze jeneralizadu hahú hosi Prezidente Repúblika, Parlamentu Nasionál no Governu mós sente katak ne’e tempu maibé ita tenke defini kritériu ne’ebé rigorozu, nune’e bainhira Governu autoriza sira tenke kumpre”, Primeiru-Ministru, Taur Matan Ruak, ba jornalista sira iha Palásiu Prezidente Nicolau Lobato, Bairru Pité, kinta ne’e relasiona ho ezijénsia hosi entidade oi-oin ne’ebé husu atu regula arte-marsiál.

Taur hateten tékniku sira oras ne’e diskute hela kritériu saida maka di’ak liu ba arte-marsiál atu kumpre bainhira reativa.

“En-jerál, objetivu ne’ebé Estadu hakarak maka instituisaun ka organizasaun hot-hotu iha ita-nia rai laran tenke kontribui ba estabilidade no kontribui ba armonia, seguransa no liu-liu kontribui ba dezenvolvimentu ekonómiku nasaun”, haklaken.

Nia dehan populasaun Timor ne’e sivilizadu liu, edukadu, komportamentu di’ak, tanba ne’e labele uza kestaun ida no akontesementu ida hodi dehan situasaun ne’e ladi’ak ona.

“Ita nia obrigasaun maka hateten ba oan sira katak konflitu ne’e dalan ida ne’ebé ladi’ak tanba nia rezultadu lori ladi’ak ba família no ba án rasik”, Xefe Governu subliña.

Jornalista: Xisto Freitas

Editora: Rita Almeida

Publisidade

Leave a Reply

Latest Post

error: Content is protected !!