iklan

NASIONÁL, POLÍTIKA

Membru Sekretariadu ODS-CIC Relata Servisu Ba PPN

Membru Sekretariadu ODS-CIC Relata Servisu Ba PPN

Meta ODS. Imajen/Espesiál

DILI, (TATOLI) – Membru  Sekretariadu Objektivu Dezenvolvimentu Sustentável (ODS) husi Unidade Planeamentu Monitorizasaun no Avaliasaun (UPMA) iha Gabinete Primeiru-Ministru, Ministériu Negósiu Estranjeiru no Kooperasaun (MNEK) no Ministériu Finansa (MF) hamutuk ho Sentru Kooperasaun Internasionál (CIC-sigla inglés) husi Amérika, relata progressu servisu ba Prezidente Parlamentu Nasionál (PPN), Arão Noe.

“Avaliasaun husi ekipa sira ne’ebé mak mai katak Timor-Leste hafoin independensia foin tinan 17, mas iha progresu iha setór hotu, mesmu ita sei iha dezafíu área balun maibé ita komesa rezolve buat balun”, katak PPN ba jornalista sira iha parlamentu, ohin.

Prezidente orgaun lejislativa hatete ekipa tékniku husi programa ODS husu audiénsia, tanba ekipa ida mai husi Amérika mai haree dezenvolvimentu programa ODS nian la’o oinsá, susesu oinsá no dezafíu saida atu bele halo relatóriu ba Organizasaun Nasaun Naklibur Sira (ONU-sigla inglés).

Tuir Arão, Timor-Leste sai hanesan membru no fundadór husi grupu ODS, tanba ne’e mak importante tebes ekipa husi CIC haree progressu ho relasaun husi planu no programa sira ne’ebé mak la’o durante ne’e.

Parte seluk Asessor Planu Estratéjiku ba Jestaun iha UPMA, António Vitor, hateten misaun ida  husi CIC ne’ebé mak servisu ba nasaun sira ne’ebé pioneiru hodi dudu husi ODS númeru 16 ne’ebé ko’alia kona-ba dame, justisa no intituisaun sólida atu inklui iha ODS ne’ebé mak dadauk nasaun barak mak kompromete atu hala’o.

“ODS númeru 16 ba tinan ida ne’e desde 2015 kuandu lansa ona ODS, Timor-Leste hanesan nasaun ida ne’ebé dudu hodi ODS númeru 16 ne’e bele inklui iha laran”, dehan tan.

Nia realsa kada tinan ONU halo revizaun ba ODS haat, tinan ne’e sira halo revizaun inklui ODS nú 16, ne’ebé Timor-Leste sai pioneiru hanesan nasaun seluk.

“Tinan ida ne’e sira mai halo revizaun espesiál ba ODS nú 16, ne’ebé kada tinan sempre halo iha nasaun balun no tinan ida ne’e Indonézia, Timor no nasaun seluk ne’ebé sira hili atu revee fali progresu kona-ba pás, justisa, inkluzaun kona-ba jéneru to’o iha ne’ebé ona”, tenik tan.

Nia hatutan: “Ita sukat tinan 2030, iha ninia indikadór, maibé to’o agora desde 2015 kuandu introdús ita hanesan nasaun ne’e implenta to’o iha ne’ebé ona”.

Hodi dehan tan misaun CIC tinan ne’e, atu ko’alia ho nain ulun sira la’ós de’it Governu, maibé parlamentu, sosiedade sivíl ho parte interesadu hotu iha sosiedade timoroan nia laran.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!