DILI, (TATOLI) – Governu liuhosi Ministéiru Justisa, konsidera Servisu Nasionál Kadastru (SNC-sigla portugés) durante ne’e servisu ho transparante tebes, maibé nakloke ba opozisaun parlamentár atu husu ba tribunál kontas hodi halo auditória.
“Ministériu Justisa servisu ho transparante, ka nakloke ba públiku, se partidu opozisaun husu atu halo auditória ba Servisu Nasional Kadastru, ita hein de’it hosi Tribunál Kontas atu SNC bele fó resposta. Maibé se husu ba Ministériu Justisa mós sei bele hatan”, Ministru Justisa, Manuel Cárceres, ba jornalista sira hafoin hasoru malu ho Primeiru Ministru, Taur Matan Ruak, iha Pálasiu Governu, ohin.
Ministru akresenta kuandu tribunál kontas husu, sei fó resposta, maske parte balun duvida ba servisu hothotu maibé hein rezultadu servisu, rezultadu ne’e bele fó benefisiu ba povu ka la’e, ida ne’e ita hein iha tinan ikus ne’e, maibé prosesu sei hatur ninia rezultadu ne’ebé di’ak.
Tuir planu governu liuhosi SNC sei halo levantamentu parsela hamutuk mill 300 iha teritóriu laran tomak.
Enkuantu iha ámbitu Ministru Justisa hasoru malu ho Primeiru Minsitru, Taur Matan Ruak, aprezenta kona-ba programa prioridade hosi Ministériu Justisa nian iha tinan 2019.
Programa prioridade hirak ne’ebé sei realiza iha tinan ne’e mak atu halo reforsu institusionál, katak atu konsolida Ministériu Justisa nia estrutura tomak hanesan Sekretaria Estadu Terras no Propriedade ninia atu bele konsolida, nune’e bele permite atu bele halo ezekusaun programa governu nian iha setór justisa.
Orgaun judisiáriu mós sei haree ba infraestrutura, signifika sei hadi’a Diresaun Nasionál Rejistu Sivíl, rejistu notariadu nia fatin hodi hadi’a atu bele fó atendimentu di’ak ba públiku ne’ebé presiza trata dokumentu.
Nune’e mós Ministériu Justisa sei fó prioridade ba formasaun iha sentru jurídiku no judisiáriu iha Kaikoli, oinsá atu rekruta maluk sira atu ba tuir formasaun inklui reforma lejislativa, maka hanesan lei sira ne’ebé tenke halo, ezemplu; ita iha lei terras propriedade, maibé presiza halo tan diploma lejislativa sira atu bele implementa lei ne’e.
Jornalista: Zezito Silva
Editora: Rita Almeida
