Top

Prezidente Repúblika Sei Fó Perdaun Ba Dadur Balun Iha Fulan Maiu

Ministru Justisa, Manuel Cárceres da Costa. Imajen António Goncalves

DILI, (TATOLI) – Ministru Justisa, Manuel Cárceres da Costa, hala’o enkontru ho Prezidente Repúblika, Francisco Guterres Lú Olo, kona-ba dadus dadur sira ne’ebé atu simu indultu (perdaun).

“Prezidente Repúblika husu Ministru Justisa mai esplika ba Xefe Estadu, tanba preokupa ho ita nia maluk timoroan sira ne’ebé iha hela iha prizaun Bekora, Glenu no Suai, liu-liu kona-ba prosesu indultu ba maluk sira ne’ebé merese atu hetan indultu”, Cárceres ba jornalista sira iha Palásiu Prezidente Nicolau Lobato, Bairru Pité, sesta (15/2).

Manuel esplika tuir dekretu Prezidensiál nian katak kada tinan Prezidente Repúblika fó indultu ne’e dala rua maka hanesan iha loron Restaurasaun Independénsia, 20 Maiu, no loron Proklamasaun Independénsia, 28 Novembru.

“Agora ne’e ami atu hahú ona prosesu para depois bele hato’o lista ita nia maluk sira ne’ebé maka bele hetan indultu hosi Prezidente Repúblika. Prosesu ne’e bele mai hosi dadur nia família, dadur nia advogadu no bele mai hosi diretór serbisu prizionál sira nian. Kle’ur liu to’o iha abril lista ne’e bele tama ona iha Gabinete Prezidénsia Repúblika”, salienta.

Nia esplika indultu ne’e tuir komprimentu pena no razaun umanitária. Kuandu invoka razaun umanitária maka saúde, entaun tuir lei tenke iha atestadu hosi junta médika katak dadur ne’e labele hetan tan dadur iha prizaun.

“Lei indultu nian hateten katak krime sira ne’ebé maka oho ema ka hasai ema nia liberdade, violasaun seksuál ba minor idade tenkiser pondera halo didi’ak maka foin fó indultu”, governante ne’e haklaken.

Aleinde ne’e, nia haktuir Prezidente Repúblika mós manifesta preokupasaun kona-ba advokasia ka kna’ar advogadu sira nian no kna’ar defensór públiku sira nian atu defende direitu maluk prizioneiru sira nian, maluk sira ne’ebé suspeitu no maluk sira ne’ebé hasoru justisa iha Tribunál.

“Ida fali mós Prezidente Repúblika manifesta nia preokupasaun kona-ba maluk sira ne’ebé ho estatutu prizaun preventiva hela”, katak.

“Ha’u simu apelu, mensajen no simu apoiu morál hosi Prezidente Repúblika para ajuda ami hodi hala’o ami nia kna’ar liu-liu kona-ba prosesu indultu ninian no prosesu atu hetan liberdade kondisionál hosi ita nia maluk sira ne’ebé  tempu to’o ona para hetan liberdade kondisionál”.

Jornalista: Xisto Freitas

Editora: Rita Almeida

Publisidade

Leave a Reply

Latest Post

error: Content is protected !!