Top

Bankada CNRT: Karta Prezidente Partidu Hanesan Reklamasaun La’ós Interférensia

Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI (TATOLI) – Bankada Kongresu Nasionál Rekonstrusaun Timor (CNRT-sigla portugés) liu deklarasaun polítika iha plenária segunda ne’e klarifika katak karta Prezidente Partidu CNRT, Kay Rala Xanana Gusmão, ba Prokuradora Jerál Repúblika (PJR), Lídia Soares, hanesan karta reklamasaun no protesta, la’ós hanesan interferénsia poder.

“Ami hakarak dehan karta Maun Boot Xanana ba PJR la’ós karta interferénsia ba poder esklusivu Ministériu Públiku nian, maibé hanesan karta reklamasaun no protesta sidadaun ida ho naran Kay Rala Xanana Gusmão ba irregularidade prosesuál”, afirma deputada, Veneranda Lemos Martins, iha deklarasaun polítika bankada nian iha uma fukun ne’e, ohin.

Hodi hatutan: “Ho razaun hirak ne’e mak maun boot Xanana kualidade hanesan prezidente partidu ka ema ne’ebé simu karta notifikasaun halo protesta ba PJR nu’udar superiór Ministériu Públiku nian”.

Nune’e bankada governu ne’e konsidera PJR laiha koñesimentu di’ak ba kódigu prosesuál iha sira-nia lia-fuan no asaun rasik no lahatene duni diferénsia entre notifikasaun nu’udar aktu judisiá no karta informasaun nu’udar aktu konsiderasaun ida.

“Ami sente triste tebes ho deklarasaun hosi autór justisa hirak ne’e, tanba Estadu lakon osan lubuk ida ona hodi investe ba Instituisaun judisiária sira iha área kapasitasaun, maibé infelismente hatudu momoos ba ita katak kapasidade hosi orgaun judisiária, espesialmente PJR tenke hetan tan atensaun maka’as liu hosi avaliasaun téknika jurídika ne’ebé mak rigorozu hosi Inspetór Ministériu Públiku”, dehan.

Hodi husu inspetór Ministériu Públiku ne’ebé mak iha kualidade aas no esperiénsia maka’as, bele hadi’a di’ak liután ajente ministériu públiku nia kapasidade hodi fornese justisa ne’ebé nakonu ho kualidade ba povu, no nasaun doben Timor-Leste.

Antes ne’e bankada Frente Revolusionária Timor-Leste Independente (FRETILIN) halo deklarasaun polítika ne’ebé husu ba ema hotu hodi defende no respeita konstituisaun hanesan mahon ba Nasaun.

“Bankada FRETILIN kondena tentativa hotu-hotu atu intefere, intimida ka infrakeza ita nia orgaun judisiária sira nia dezempeñu”, hateten Vise Xefe Bankada FRETILIN, Francisco Miranda Branco, iha deklarasaun polítika semana hirak liubá.

Entretantu iha loron 18 janeiru 2019, Prezidente Partidu CNRT, Kay Rala Xanana Gusmão, manda karta ida ba PJR.

Jornalista: Julia Chatarina

Editora: Rita Almeida

Publisidade

Leave a Reply

Latest Post

error: Content is protected !!