DILI, (TATOLI) – Governu liuhosi Ministru Interiór interinu atúal Ministru Defeza, Filomeno Paixão, Sekretáriu Estadu Juventude no Desportu (SEJD), Nélio Isaac Sarmento, no Komisaun Reguladór Arte-Marsiál (KRAM), ohin halo diskusaun hodi buka solusaun ba problema ne’ebé mosu entre arte-marsiál Persaudaraan Setia Hati Terate (PSHT), Kmanek Oan Rai Klaran (KORK) no Ikatan Kera Sakti (IKS) iha edifisiu Ministériu Defeza, Fatuhada.
“Ami troka informasaun hodi buka solusaun oinsá maka bele haree problema nia hun loloos ne’e iha ne’ebé, problema hun ne’e problema polítiku ka arte-marsiál ou individu ne’ebé uza naran arte-marsiál, lei ka iha tribunál”, dehan Sekretáriu Estadu Juventude no Desportu, Nélio Isaac Sarmento, ba jornalista sira hafoin sorumutu.
Nia dehan sorumutu ne’e konsege hetan konkluzasaun balun atu instuisaun Estadu sira uza hodi foti desizaun. “Ami identifika problema lubuk ida ona, bele sai hanesan matéria diskusaun hodi toma medida iha tempu besik”.
Mesmu identifika ona problema ne’e, maibé parte tolu seidauk bele públika ba públiku tanba sei kontinua iha diskusaun.
Alende ne’e sei atualiza rezultadu diskusaun ne’e ba Primeiru-Ministru, Taur Matan Ruak, Prezidente Repúblika, Parlamentu Nasionál no lideransa seluk hodi buka solusaun.
“Ami nia obrigasaun atu esplika ba Prezidente Repúblika hodi intende loloos problema nia hun, nune’e labele hetan informasaun hosi parte ida de’it maibé hosi parte hotu, nune’e mós ba orgaun sira importante atu buka solusuan”, governante hateten.
Entretantu iha diskusaun ne’e, SEJD aprezenta ba ministru defeza kona-ba knaar KRAM hodi desemina informasaun ba públiku kona-ba lei númeru 5/2017 ne’ebé regula prátika arte-marsiál sira nian no rituál, arma branka ne’ebé define iha artigu 2 númeru 1 ko’alia kona-ba katana, espada no seluk tan, rama ambon kompletamente kriminál liu ho pena tinan 4 to’o 8 inklui alterasaun ba kódigu penál iha artigu 11.
Nune’e mós ministru defeza aprezenta prosesu operasaun konjunta entre Polísia Nasionál Timor-Leste (PNTL) no FALINTIL-Forsa Defesa Timor-Leste iha kapitál hodi buka tuir autór rama ambon ne’ebé kria instabilidade.
Jornalista: Agapito dos Santos
Editora: Rita Almeida
