Top

Hahú Ohin OJE 2019 Bele Ezekuta Ona

Diretór Jerál Finansa Estadu, Januario da Gama. Foto/MF.

DILI, (TATOLI) – Ministériu Finansa (MF) fahe ona pakote orsamentu aprovadu 2019 nia ba liña ministériu no instituisaun Estadu, nune’e ho ditribuisaun tetu 2019 ne’e bele ona ezekuta orsamentu tinan ida ne’e hahú ohin.

Diretór Jerál Finansa Estadu MF, Januário da Gama, hatete depois Prezidente Repúblika promulga Orsamentu Jerál Estadu 2019 iha 7 fevereiru, MF halo kedan ezersísiu tékniku lubuk ida oinsá bele asegura ezekusaun orsamentu ne’e iha períodu fulan ne’e nia laran.

Tanba, nia hatutan prosesu tékniku liu hotu ona no mai ho konkluzaun ida katak en termu sistema no dokumentu orsamentu rasik prontu ona atu ministériu no instituisaun ezekuta ona sira-nia orsamentu.

Liuhusi sesesan traballu ne’e iha objetivu rua importante mak esplika kona-ba regra no prosedimentu kona-ba ezekusaun OJE 2019 nia rasik no fahe pakote aprovadu ba ministériu no instituisaun ida-idak.

Liuhusi pakote aprovadu, nia afirma fahe kona-ba impaktu husi aplikasaun rejime duodesimál ne’ebé ministériu balu tenke sofre defisiénsia balun.

Diretór Jerál ne’e relata OJE 2019 depois halo reapresiasaun iha Parlamentu Nasionál hodi hasai milliaun $650 husi pakote orijinál no husi apresizaun finál no promulgasaun ne’ebé iha totál OJE maka billiaun $1,482.

Husi montante ne’e distribui ba kategoria saláriu no vensimentu milliaun $214, bens no servisu milliaun $472,9, transferénsia públika milliaun $362, kapitál menór milliaun $31,2 no kapitál dezenvolvimentu milliaun $400,7.

“Husi ida ne’e, distribuisaun ne’ebé maka halo, halo ona dezagregasaun pur ministériu ida-ida no ministériu ida-idak iha ona informasaun klaru en termu prosesu no prosedimentu atu komesa ohin bá oin bele iha ona autoridade, kapasidade hodi halo ezekusaun ba ita-nia Orsamentu Jerál Estadu 2019”, Januário afirma iha Aitarak-Laran.

Hatán kona-ba implikasaun ba ezekusaun tanba foin maka atu ezekuta, Januário dehan bainhira haree ba esperiénsia ezekusaun orsamentu iha rejime duodesimál nian, iha janeiru MF lansa pakote orsamentu duodésimu ho plafon milliaun $71 no ho aplikasaun rejime duodesimál konsidera ho tempu no prosesu sira ne’e hotu iha Governu tomak ezekusaun atinje de’it porsentu 51 husi tetu duodésimu fulan kotuk ne’e.

“Bainhira haree ba aplikasaun rejime duodesimál nia prosedimentu loloos iha inísiu fevereiru kedan ita bele lansa ona orsamentu rejime duodesimál ba fevereiru nian, maibé depois ita akompaña prosesu sira ne’e hotu Prezidente Repúblika promulga ona orsamentu ida ne’e entaun lanesesáriu atu lansa tan rejime duodesimál, nune’e Ministériu Finansa suspende rejime duodesimál no prepara hela kondisaun oinsá bele tama kedan ba ezersísiu ezekusaun orsamentu 2019”.

Mai ho prespetiva ne’ebé ema barak kestiona katak ho atraza distribuisaun tetu orsamentu 2019 sei kontribui mós ba iha atrazu ezekusaun orsamentu 2019 nian tanba iha rejime doudesimál gasta ona orsamentu balu, halo ona rekonsiliasaun mai orsamentu 2019, pur tantu foin maka iha primeiru trimestre fulan ne’e nian no espera ministériu hotu-hotu iha ona planu ezekusaun no aprovizionamentu, entaun orsamentu ida ne’e bainhira distribui sira bele hola reflesaun ba sira planu ezekusaun no aprovizionamentu oinsá bele kontribui no hatudu sira-nia dezempeñu iha prátika ezekusaun orsamentu nian.

Jornalista: Maria Auxiliadora

Editora: Rita Almeida

Publisidade

Leave a Reply

Latest Post

error: Content is protected !!