iklan

NASIONÁL, SAÚDE

Bebe Kaduak Mate Tanba Distribuisaun Hahan La Balansu

Bebe Kaduak Mate Tanba Distribuisaun Hahan La Balansu

Governu liuhosi Vise Ministru Saúde, Bonifácio Maukoli dos Reis, hato’o sentidu kondolénsia ba família hosi bebe kaduak iha mortuáriu HNGV. Imajen Agapito dos Santos

DILI, (TATOLI) – Diretór Ezekutivu Ospitál Nasionál Guido Valadares (HNGV-sigla portugés), Aniceto Cardoso Barreto, hatete ninia parte halo esforsu oinoin atu oinsá bebe feto kaduak ne’e bele hetan operasaun (halo separasaun/hafahe), maibé distribuisaun hahan ba bebe sira nian isin lolon la-hanesan, nune’e bebe nain rua ne’e hakotu iis iha HNGV, maizumenus oras meudia.

“Órgaun isin suplai (fornese) ai-han la-hanesan, tanba bebe rua moris mai ho isin la-hanesan, ida boot no ida ki’ik”, dehan nia ba jornalista iha HNGV, loraik ne’e.

Nia haktuir HNGV halo atendementu liuhosi meius oi-oin hanesan diagnóstika no Computerized Tomography  (CT) scan atu halo operasaun, maibé labele tanba bebe nain rua ho órgaun ida hanesan fuan, difísil atu halo operasaun.

“Ita leno kompletu hodi haree sira nia órgaun iha laran hanesan kurasaun ida de’it entaun ita atu opera halo nusa”, afirma.

Bebe rua ne’e ho todan kilograma haat resin, ne’e normál maibé bebe rua ne’e ida boot no ida ki’ik entaun hosi ida boot tenke fornese fali hahan ba ida seluk. Durante tratamentu, doutór sira fornese hahan ba bebe ho soru liuhosi inus.

Governu Hato’o Sentidu Triste Ba Família

Entretantu, governu liuhosi Vise Ministru Saúde, Bonifácio Maukoli dos Reis, hato’o sentidu kondolénsia ba família hosi bebe kaduak.

Bebe kaduak ne’e hosi suku Kamanasa, postu Suai Villa, munisípiu Kovalima nu’udar oan dahuluk hosi kazadu Adelaide Maria no Bruno dos Santos Godinho.

Bebe kaduak ho kabun belit malu no fuan ida ne’e evakua hosi ospitál referál Suai mai HNGV iha loron 18 fevereiru 2019 hafoin partus iha loron 17.

“Buat hotu planu Nai Maromak nian fó no foti fila fali maibé esforsu tomak ita nia espesialista sira, doutór no enfermeira sira halo, maibé la konsege salva”, katak Governante ne’e bainhira vizita sala mortuáriu hodi hato’o direta sentimentu kondolénsia ba família.

Entretantu, mate isin hosi bebe nain rua lokraik ne’e tula ona ba munisípiu Kovalima ho kareta funeráriu.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!