Governu Aloka Rihun $200 Resin Komemora Loron Veteranu
DILI, (TATOLI) – Governu liuhosi Ministériu ba asuntu Kombantente Libertasaun Nasionál aloka orsamentu rihun $200 resin ba komemorasaun da-ruak loron veteranu iha tinan 2019.
Ministru en ezersísiu, Gil da Costa Monteiro ‘Oan Soru’, hatete loron 1 marsu sei iha selebrasaun misa agradesimentu ne’ebé hala’o iha jardim Eroi Metinaru.
Iha loron tuir mai, 2 marsu sei iha semináriu nasionál ho tema reflesaun ba loron 3 marsu ba dala 38 bainhira akontese konferénsia nasionál 1981 depois saudozu Nicolau Lobato mate.
Loron tolu kontinua kedas ho seremonia isár bandeira nasionál iha Palasiu Governu, depois kontinua ho almoco konfraternizasaun no divertimentu iha Sentru Konvensaun Dili.
“Primeiru-Ministru, Taur Matan Ruak, maka sei sai oradór hodi lori tema ida iha semináriu ne’e”, dehan nia ba Tatoli iha Palásiu Governu, ohin.
Selebrasaun konsentra de’it iha kapitál, tanba governu foin komemora ba da-ruak, enkuantu munisípiu laiha.
Hatan kona-ba kondekorasaun ba veteranu iha loron istóriku ne’e, Governante ne’e hatete laiha tanba governu seidauk iha planu kondekorasaun.
Seremonia isár bandeira ne’e sei partisipa hosi membru Governu da-ualu, Parlamentu Nasionál, Prezidente Repúblika, Tribunál, instituisaun Estadu sira nomos reprezentasaun universidade ema nain 40 kada universidade.
“Konvite fahe komesa horiseik no ohin kontinua fahe remata ba instituisaun Estadu sira hotu”, tenik tan.
Jornalista: Agapito dos Santos
Editora: Rita Almeida
