Adjuntu PDHJ Nain Rua Simu Ona Posse

DILI, (TATOLI) – Miguel Pereira ho Deniçia Magno, ohin simu pose hosi Prezidente Parlamentu Nasionál, Arão Noe, nu’udar Adjuntu Provedoria Direitu Ema-Nian no Justisa (PDHJ-sigla portugés).
Prezidente Parlamentu Nasionál, Arão Noe, hateten adjunta PDHJ, Deniçia Magno, sei toma ba asuntu direitu ema-nian no Miguel Pereira sei haree ba asuntu governasaun di’ak.
“Ohin marka istória importante ida ba ita tomak, tanba ofisialmente iha ona adjuntu provedór nain rua ne’ebé sei servisu hamutuk ho provedora hodi promove di’ak liután direitu ema nian no governasaun di’ak iha ita nia rai”, afirma.
Parlamentu Nasionál iha esperansa katak ho nomeasaun ba adjuntu nain rua ne’e sei fasilita liután funsionamentu PDHJ hodi responde ba reklamasaun hosi sosiedade, liuliu intesifika liután edukasaun no formasaun iha área direitu umanu no governasaun di’ak.
Parlamentu sei kontinua asegura polítika ho pontu prinsipál sira maka asegura sidadaun hothotu nia direitu, nune’e mós parlamentu sei halibur forsa polítika sira hodi asegura instituisaun Estadu sira nia servisu inklui PDHJ, atu garante governasaun di’ak iha Timor-Leste.
Iha planu estratéjiku dezenvolvimentu nasionál 2011 to’o 2030, setór justisa nian, Timor-Leste buka atu atinje vizaun sira katak sidadaun hotu tenke iha asesu ba justisa ho baze respeitu ba direitu ema-nian no respeitu ba Estadu Direitu Demokrátiku.
Atu atinje vizaun ne’e maka planu estratejiku dezenvolvimentu nasionál prevee ona katak papel PDHJ hamutuk ho instituisaun Estadu sira seluk atu kontribui ba esforsu sira hodi atinje meta ida ne’e.
Nune’e mós, Provedora PDHJ, Jesuina Gomes, apresia ba adjuntu nain rua no husu atu labele involve iha atividade polítika no labele manan saláriu iha kualker organizasaun seluk.
Tanba ne’e, kompeténsia prinsipál PDHJ nian maka halo investigasaun, fiskalizasaun, halo rekomendasaun, promosaun ba direitu ema-nian no governasaun di’ak.
Atu hala’o knaar hirak ne’e , presiza reforsa tan kooperasaun institusionál no fó prioridade ba programa ne’ebé foka ba vítima, dizemina informasaun no hasa’e konsiénsia públiku, hala’o monitorizasaun ba programa ne’ebe mosu ligadu ho misaun no vizaun PDHJ nian.
Entretantu, ho prezensa adjuntu nain rua nian, sei fó apoiu másimu ba PDHJ hodi implementa no alkansa objetivu iha planu estratéjiku dezenvolvimentu nasionál no planu asaun anuál PDHJ nian.
Jornalista: Zezito Silva
Editora: Rita Almeida

