DILI, (TATOLI) – Sentru Formasaun Téknika Komunikasaun (CEFTEC-sigla portugés), Embriaun ba Institutu Formasaun Jornalista, promove feto partisipa iha kursu kualifikasaun nasionál iha komunikasaun no mídia ho sertifikadu nivel IV-INDMO (Institutu Nasionál Dezenvolvimentu Traballu-sigla inglés) ho formasaun komunikasaun no teknolojia foun iha formasaun ba tinan 2019.
CEFTEC hahú formasaun ho unidade hakerek imprensa no relasaun públika ho protokolu.
Formasaun ho unidade hakerek iha tempu dader no relasaun públika ho protokolu iha lorokra’ik. Hahú ohin to’o 16 abril, ho durasaun tempu 80.
Unidade hakerek feto na’in 11 no mane na’in hitu. Enkuantu, relasaun públika no protokolu feto na’in 14 no mane na’in lima. Katak, jerálmente iha formasaun ba unidade rua ne’e feto hamutuk na’in 26 no mane 12.
“Tanba ne’e orgullu ida ba instituisaun rasik, ita-nia governu rasik, tanba ita-nia númeru partisipasaun feto ne’e aas tebes”, dehan Diretór CEFTEC, Luis Evaristo dos Santos, iha abertura formasaun ne’e iha Palásiu Governu, segunda (11/3).
Iha fatin hanesan, Sekretáriu Estadu Komunikasaun Sosiál, Merício Juvenal dos Reis Akara, konsidera partisipante sira ne’e feto hamutuk porsentu 80, nune’e sekretáriu estadu demonstra nia sentimentu kontente ho formasaun ne’ebé promove mós partisipasaun feto ne’e.
“Ita-nia diretór ho nia ekipa formadór iha tinan ne’e sei halo formasaun ida ne’ebé mak profisionál, sei garantia nia kualidade tuir standard (padraun-red) INDMO nian”, hateten governante ne’e.
Partisipante sira ne’e mai husi liña ministérial, FALINTIL-FDTL (Forsa Defeza Timor-Leste), finalista husi universidade sira, Parlamentu Nasionál no entidade orgaun Estadu no privadu sira seluk.
Promosaun feto nu’udar mós polítika ida husi oitavu governu konstitusionál inkluzivamente iha pájina 32, númeru 2.3.2. (feto) programa governu nian.
Katak, feto ho mane iha direitu no obrigasaun ne’ebé hanesan iha aspetu hotu-hotu, iha moris família nian, kulturál, sosiál, ekonómika no polítika.
Atu direitu hirak ne’e bele konkretiza ho di’ak liután, hodi feto timoroan sira bele kontribui barak liu no di’ak liu ba ita-nia sosiedade no ba kreximentu ka dezenvolvimentu rai nian, mak Governu sei estímula krisaun negósiu auto-sustentável ba feto sira inklui sira ne’ebé sai xefe família no sira ne’ebé sai vítima ba violénsia doméstika no violénsia bazeia ba jéneru hodi asegura independénsia ekonómika.
Garante katak porsentu 60 husi feto sira bele hetan asesu ne’ebé hanesan ba pozisaun foti desizaun nomós hetan asesu ba justisa no seguransa (PED 2022).
Koopera ho Ministériu Edukasaun, Juventude no Desportu atu revee, no kontinua asegura implementasaun kurríkulu ne’ebé sensível ba jéneru ho efetivu no efikásia iha sistema ensinu.
Kontinua promove asaun sira kona-ba formasaun profisionál iha área sira ne’ebé bele hamosu empreza ki’ik no natón no mós kooperativa sira ne’ebé lídera husi feto.
Koopera ho Ministériu Edukasaun, Juventude no Desportu no mós Komisaun Nasionál ba Direitu Labarik atu asegura katak porsentu 75 husi labarik feto sira ho idade eskolár, bele remata ensinu báziku (PED 2022).
Kontinua implementa Planu Asaun Nasionál kona-ba Violénsia Bazeia ba Jéneru 2017-2021, Kontinua implementa Planu Asaun Nasionál kona-ba feto, pás no seguransa, kontinua implementa kampaña sira atu luta hasoru violénsia doméstika, kontinua implementa polítika orsamentu sensível ba kestaun jéneru sira nian.
Inklui, halo advokasia atu asegura orsamentu jerál estadu nian sensível ba jéneru, Koordena ho SEFOPE atu asegura kondisaun servisu ne’ebé diak liu ba feto, ne’ebé mós hanesan mães edukadoras, liuhusi revizaun ba lejislasaun, regulamentu ho estatutu laborál sira no apoia ba organizasaun no asosiasaun feto sira ne’ebé defende ba feto sira nia direitu no interese.
Jornalista: Rafy Belo
Editora: Rita Almeida
