PM Konsidera Kapasidade Estadu Kria Empregu Sei Mukit

DILI, (TATOLI) – Primeiru-Ministru, Taur Matan Ruak, afirma Estadu nia kapasidade kria empregu ba sidadaun sei mukit, tanba kada tinan kuaze joven hamutuk 15,000 ne’ebé aumenta maibé buka serbisu la hetan.
“Ita nia kapasidade atu absorve sira, primeiru, Estadu rasik no segundu dezenvolvimentu infraestrutura seidauk másimu maibé ne’e la’ós permanente”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e hafoin sorumutu ho Prezidente Repúblika, Francisco Guterres Lú Olo.
Tuir nia sidadaun Timor ne’ebé maka sai ba Irlanda no Englaterra ne’e ho inisiativa rasik no balun governu maka organiza hanesan ba Austrália no Korea, dadaun ne’e negósia hela ho Japaun para bele simu traballadór timoroan.
“Ne’e fó vantajen ba ita, tanba sira hatama rendimentu mai iha ita nia rain ne’ebé mós benefísia família sira”, nia haktuir.
Nia hututan Austrália fó tan posibilidade ba Timor liu-liu atu asina akordu Pacific Labour Scheme (PLS), sei simu traballadór timoroan la’ós ona fulan tolu maibé durasaun to’o tinan tolu.
“Ida ne’e fó oportunidade barak loos ba ita nia traballadór timoroan sira. Aleinde ne’e, Kanadá no Malázia mós hakarak simu ita nia traballadór sira. Purtantu, ita esplora másimu posível iha ne’ebé enkuantu ita nia kapasidade kria serbisu ba sidadaun seidauk másimu, ita buka dalan para sira bele hetan serbisu”, Taur esklarese.
Jornalista: Xisto Freitas
Editora: Rita Almeida

