Governu Aloka Millaun US$5 ba Eskola CAFE

MALIANA, 22 maiu 2019 (TATOLI)-Tinan-tinan Governu sei aloka millaun US$5 ba Eskola Sentru Aprendizajen Informasaun Eskolár (CAFE-sigla portugés) hodi selu subsídiu profesores portugés no servisu administrasaun nian.

“Ita apoiu eskola 12, inklui Rejiaun Administrativu Espesiál Oe-Cussé Ambeno (RAEOA) purvolta millaun US$5 hodi jere tuir númeru estudante no nesesidade eskola nian hotu,” informa Ministra Edukasaun Juventude no Desportu (MEJD), Dulce de Jesus Soares, ba Jornalista hafoin inaugura eskola CAFE iha Maliana, Munisípiu Bobonaro, Tersa (21/5/2019).
Iha tinan 2012, Ministra Dulce de Jesus Soares, hatete, Governu Timor-Leste ho Portugal estabelese kooperasaun ida hodi harii eskola CAFE hamutuk 13 iha munisipiu 12, inklui RAEOA ho total estudante ativu hamutuk 7000-resin.
“Ita iha profesores kuadru hosi Portugal ne’ebé governu selu sira ninia subsídiu ida mezmu sira nafatin hetan sira nia saláriu hosi governu Portugal, oras ne’e ita iha profesores 140 maka espalladu iha territóriu,” hateten Ministra Dulce.
Nia dehan, estabelesimentu eskola CAFE ne’e importante atu apoiu governu hodi promove no mellora lian nasionál portugés tanba eskola ne’e hanorin matéria hotu ho lingua portugés.
Tuir polítika Governu da-ualu nian, durante tinan lima sei konstrui sala aprendizajen ba eskola públiku purvolta rihun ida resin.
Jornalista : Agapito dos Santos
Editór : Francisco Simões

