Prezidente Repúblika To’o Ona iha Covalima ho Aviaun ZEESM

COVALIMA, 27 juñu 2019 (TATOLI)-Prezidente Repúblika, Francisco Guterres Lú Olo, akompaña husi nia espoza, Cidália Nobre Lopez Mouzinho Guterres, ohin, tuku 8:30 Oras Timor-Leste (Otl), to’o ona Aeroportu Internasionál Komandante Em Xefe das FALINTIL, Kay Rala Xanana Gusmão, ho aviaun ZEESM.

Prezensa Xefe Estadu ho nia delegasaun iha Covalima, simu husi administradór Munisípiu Covalima, Afonso Nogueira Nahak, ne’ebé entrega ai-funan nu’udar sinál domin povu Covalima nian ba Prezidente Repúblika ho nia espoza.
Reprezentante povu Covalima nian tara mós tara tais ba Prezidente Repúblika ho nia espoza no simu prezensa Xefe Estadu nian ho bidu tradisionál husi estudante Covalima oan sira.
Delegasaun PR nian ne’e mós akompaña husi membru Parlamentu Nasional, Adriano do Nascimento, membru governu, kompostu husi Vise Ministru Edukasaun, João Zacarias Freitas Soares, Vise Ministru Obras Públiku, Nicolau Lino Freitas Belo, Sekretáriu Estadu Terras no Propriedade, Mário Ximenes, Sekretáriu Estadu Formasaun Profisionál no Empregu, Julião da Silva, ho mós autoridade lokál.

Husi Aeroportu, Xefe Estadu ba presta omenajen iha monumentu Masakre Setembru Negro no sei deskansa minutu balun iha Otél Vida Nova. Depois, sei hala’o vizita ba Eskola Sekundária Jerál Públiku Seran-Kotek no kontinua vizita ba Prizaun Covalima hodi hasoru dadur sira ho mensajen dame.
Xefe Estadu halo mós vizita ba Ospitál Referral Covalima, hodi halo abertura no enserramentu ba semináriu kona-ba Prevensaun Moras Kankru ne’ebé organiza husi Ministériu Saúde.
Iha lokraik, tuku 16:00 Otl, Prezidente Repúblika sei vizita Grupu Produtores, Kriatividade produsaun arte zenatu (Rotan), inklui vizita ba Eskola Ensinu Báziku Públiku Ogues no vizita mós ba Sentru Formasaun Canossa Covalima.
Tuir ajenda katak, sesta (28/06/2019), PR Lú Olo sei halo diálogu ho tema “Ho Diálogu sei Hetan Solusaun ba Problema Ne’ebé De’it, Ita Presiza Rekoñese Idak-idak Nia Matenek, Kualidade no Kontribuisaun.”
Diálogu ne’e hala’o iha salaun enkontru Santa Rosa-Covalima no sei partisipasaun másimu husi autoridade lokál, veteranu, lia na’in, sosiedade sivíl, konviksaun relijiozu, grupu juventude, komunidade sira, hodi hato’o preokupasaun kona-ba sitasaun polítika atuál no problema sosiál ne’ebé komunidade sira hasoru.
Remata diálogu, Prezidente Repúblika sei entre mós ai-oan hamutuk hun 200 ba povu postu administrativu atu kuda hamatak ambiente Suai Loro.
Munisipiu Covalima lokalizadu iha zona osidentál país, besik fronteira ho Indonézia. Iha abitante 59.455 mil (Sensu 2010) no área ida ho 1.226 km². Nia kapitál mak sidade Suai ne’ebé hela 138 km iha Sudoeste Dili, kapitál Timor-Leste. Munisípiu Covalima kobre Postu Administrativu Fatululik, Fatumean, Fohorén, Mape-Zumulai, Maukatar, Suai no Tilomar.
Jornalista : Eugénio Pereira
Editór : Francisco Simões

