Tempu Besik, MJ Finaliza Ezbosu Lei Organizasaun Judisiáriu
DILI, 18 jullu 2019 (TATOLI)-Ekipa tékniku Ministériu Justisa, iha tempu besik sei finaliza ezbosu lei organizasaun judisiáriu.
Atu atinje alvu ne’e, Ministru Justisa, Manuel Cárceres da Costa, ohin, lidera diskusaun Konsellu Koordenasaun Justisa, kompostu hosi Ministériu Justisa, Prezidente Tribunál Rekursu, Deolindo dos Santos, Prokuradór Jerál Repúblika, José Ximenes, Diretór Sentru Formasaun Judisiáriu, Polisia Sientífika Investigasaun Kriminál (PCIC-sigla portugés) no reprezentante advogadu hodi armoniza ezbosu lei organizasaun judisiáriu ne’e.
“Iha semana oin ekipa téknika komesa hahú reuniaun para atu armoniza ideia atu bele prodús ezbosu lei organizasaun judisiária no hein katak to’o fulan ikus jullu ne’e ezbosu refere tenke prontu ona,” hateten Ministru Manuel Cárceres da Costa, iha salaun Ministériu Justisa, Dili.
Tuir planu, ministériu sei halo konsultasaun ho públiku kona-ba ezbosu lei ne’e hafoin ekipa tékniku finaliza hodi kontinua lori ba aprezenta iha Konsellu Ministru.
“Atu halo reforma justisa ne’e tenke haree uluk fundamentu saida mak hari iha Timor-Leste lao de’it regulamentu UNTAET na’in durante tinan 10 ona ne’ebé la kondís ona ho evolusaun agora. Ho reforma iha setór justisa, atu ema hotu-hotu hakarak haree setór justisa ne’e la’o ho di’ak,” afirma Manuel Cárceres.
Jornalista : Nelson de Sousa
Editór : Francisco Simões
