Dezenvolvimentu Tenke Hahú Hosi Baze

BAUCAU, 03 agostu 2019 (TATOLI)—Komunidade sira iha Munisípiu Baucau espera katak, dezenvolvimentu ne’ebé ukun na’in sira trasa tenke hahú hosi baze. Atu nune’e, bele fó moris no ksolok ba povu ki’ik sira iha baze.

Mario Xavier da Silva, komunidade Postu Administrativu Baguia, Munisípiu Baucau, espresa nia sentimentu iha komemorasaun loron konsulta Popular ba dala-20 (30 agostu 1999-30 agostu 2019) no misaun INTERFET (International Force East Timor), Sesta (02/08/2019), iha Baucau, husu governu lori dezenvolvimentu hahú hosi baze.
Nia husu ba Governu ne’ebé lidera hosi Komandante FALINTIL, Taur Matan Ruak, atu tau atensaun nafatin ba dezenvolvimentu infra-estrutura bázika iha area saúde, saneamentu, bee moos ho mós estrada.
“Durante ne’e dezenvolvimentu la’o di’ak hanesan eletrisidade povu maioria asesu ona, maibé sei falta buat barak presiza tau atensaun iha infra-estrutura bázika iha area rural,” hateten Mario Xavier da Silva.

Iha fatin hanesan Nuno N. de Almeida, konsidera, durante ne’e dezenvolvimentu iha Munisípiu Baucau la’o di’ak, maibé presiza aselera liu tan atu bele fó satisfasaun ba povu nia moris no kore povu hosi ki’ak no mukit.
Maria dos Santos hanesan juventude husu ba governu atu loke kampu servisu no kria oportunidade barak ba joven timoroan sira asesu tanba durante ne’e joven barak la iha servisu no dala ruma hanoin barak hodi komete iha krime sira ne’ebé prejudika estabilidade.
Jornalista : Nelson de Sousa
Editór : Francisco Simões

