Halai Karon, Sa’e Bua ho Dada Tali Hafutar Festa Referendu

BAUCAU, 03 agostu 2019 (TATOLI)-Povu Munisípiu Baucau selebra loron konsulta popular (Referendu) ba dala-20 (30 agostu 1999-30 agostu 2019) no loron Misaun INTERFET (International Force East Timor), la’ós de’it ho atividade ofisiál ou formál, maibé mós prienxe ho atividade desportiva tradisionál seluk, hanesan halai karon, dada tali no sa’e bua.
Notísia Relevante : Baucau Komemora Loron Konsulta Populár
Lahane Group Anima Baucau Ho Knananuk “Oras To’o Ona”

Atividade desportiva ne’e hala’o iha repartisaun Administrasaun Munisipál Baucau, sábadu (03/07/2019) nu’udar atividade ikus ba selebrasaun festa konsulta popular ne’ebé hala’o durante loron rua iha Munisípiu Baucau, loron 02-03 agostu 2019.
Atividade jogu hala’o karon partisipa hosi alin ki’ikoan sira ho sira idaidak nia ekipa feto na’in 14 no ekipa mane 14.

Jogu dada tali mai hosi grupu hanesan ekipa guarda munisípál, Guarda Agrikultura, Suku Buibau, Samalari, Gari-uai no postu administrativu Quelicai ne’ebé reprezenta postu neen (6).
Jogu ikus mak sa’e bua ne’ebé partisipa hosi Joven sira no aprezentasaun drama konsulta popular hosi grupu Filtera.
“Ha’u sente kontente, bele hetan primeiru lugar iha jogu desportiva halai taru karon,” Noela Santos espresa ho hamnasa hafoin simu prémiu hosi komisaun organizadora.
Prémiu ba manan na’in hosi jogu oin tolu ne’e, primeiru lugar $150, segundu lugar $125 no terseiru lugar $100.
Jornalista : Nelson de Sousa
Editór : Francisco Simões

