GLENO, 09 agostu 2019 (TATOLI)-Veterana Genoveva da Costa Martins, hosi Munisípiu Ermera, husu ba nia feto maluk iha territóriu Timor-Leste atu kontinua hametin espíritu voluntarizmu no patriotizmu hodi partisipa ativa iha prosesu konstrusaun estadu no dezenvolvimentu nasionál.
Notísia Relevante : Ermera Selebra Loron Referendu ho Reflesaun
Liuhosi selebrasaun loron konsulta populár ba dala-20 (30 agostu 1999-30 agostu 2019) no prezensa Misaun INTERFET, 20 setembru 1999 iha Munisípiu Ermera, ohin, veterana Genoveva Martins, afirma, feto maluk timoroan potensiál presiza lolo liman ba malu iha sentidu voluntarizmu no patriotizmu atu bele tulun feto maluk sira iha area remotas.
“Ita tenke suporta no buka apoiu hosi Governu atu nune’e bele kore feto hosi obskurantizmu no injustisa sosiál,” hateten veterana Genoveva Martins ba Ajénsia TATOLI nu’udar moós eis membru Parlamentu Nasionál.
Iha fatin hanesan Superintendente Polisia Natércia E.S. Martins, dehan, polisia Ermera prontu kontribui ba situasaun hakmatek no pás iha Ermera.
Hanesan feto, Natércia Martins, hateten, nia halo esforsu hotu hodi kolabora ho membru PNTL (maioria mane maluk) atu segura seguransa ba povu Ermera, inklui seguransa ba lala’ok festa konsulta populár iha area jurizdisaun Ermera nian.
“Ha’u hakarak reforsa tan katak, ita nia povu no juventude Ermera sempre fó apoiu tebetebes ba seguransa ne’e rasik,” tenik Natércia Martins.
Jornalista : Osória A.Marques
Editór : Francisco Simões
