DILI, 19 agostu 2019 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, hateten destinu troka nota diplomátika entre Timor-Leste ho Austrália, depende ba desizaun Prezidente Repúblika (PR), Francisco Guterres Lú Olo.
”Ne’e kompeténsia Prezidente Repúblika. Ha’u husu de’it se ne’e interese nasionál entaun mai ita esforsu hamutuk para konklui tiha serbisu hirak ne’e. Ita hotu-hotu tenke responsabiliza, tanba órgaun idak-idak hala’o nia kna’ar. Agora, ita labele fó-sala ema ida. Se la konsege troka nota ita hotu-hotu asumi responsabilidade,” nia dehan iha Parlamentu Nasionál, segunda ne’e.
Lee mós: Tribunál Rekursu Sei Estuda Pedidu Fiskalizasaun Preventiva Husi PR
Prezidente Parlamentu Nasionál ne’e espera molok 30 agostu Tribunál Rekursu bele iha ona desizaun finál ida kona-ba Lei Fundu Petrolífera no Lei Atividade Petrolífera, ne’ebé Prezidente Repúblika husu fiskalizasaun ba konstitusionalidade.
Antes ne’e, Arão haktuir, alterasaun hirak ne’e iha ligasaun ba malu, tanba ne’e alterasaun hirak ne’e promulga mak bele troka nota entre Timor-Leste ho Austrália iha 30 agostu.
Tuir nia, kompromisu ne’ebé iha tratadu ne’e ho anexu sira governu rua tenke kumpri. Nia esplika, se la konsege troka nota, osan %10 hosi Bayu Undan Austrália simu nafatin.
“Se mak lakon, Timor-Leste mak lakon. La’ós Austrália. Se la tama iha en-vigór, tenke suspende troka nota hodi hein lei hirak ne’e vigora,” Arão esplika.
Nia akresenta, tuir lei, loron 30 Prezidente Repúblika estuda, katak 25 agostu PR foti ona desizaun, maibé kompeténsia PR nian.
Jornalista: Evaristo Soares Martins
Editór: Xisto Freitas
