DILI, 29 setembru 2019 (TATOLI) – Komisaun Anti Korrupsaun (CAC-sigla portugés) kontinua halo sosializasaun ba prevensaun korrupsaun no promove boa governasaun.
Notísia Relevante : KAK Sei Haruka Kazu Korrupsaun 21 Ba PJR
” KAK kontinua halo ninia serbisu nee iha terrenu hahú husi nasionál too munisipál atu toma atensaun ba ajente estadu sira ba iha boa governasaun estadu nian,” afirma Komisáriu KAK, Sergio Hornay, hodi responde Ajénsia TATOLI, bainhira partisipa serimónia lansamentu do legis – PALOP + TI, iha salaun Ministériu Justisa, kinta (26/09/2019).
Hatán kona ba númeru kazu ne’ebé mak rejistu iha Tribunal, Komisáriu Sergio Hornay, esklarese, kazu barak mak tama iha KAK no halo hela analiza depende ba iha delegasaun husi nain ba asaun penál (Ministériu Públiku).
“Keixa sira ne’ebé mak tama iha KAK, balun mai husi komunidade, balun husi serbisu KAK mak deteta bainhira ba halo serbisu KAK nian iha instituisaun estadu sira,” informa Sergio Hornay.
Kona-ba fali ba serbisu operasaun konjunta hodi halo apreensaun ba motor no karreta estadu iha loron feriadu no sábadu ho domingu, Komisáriu KAK hateten, KAK sempre halo akonsellamentu nafatin halo prevensaun iha situasaun konkreta ruma. Nune’e KAK sei hamutuk ho instituisaun relevante sira para atu halo medida atu asegura no garante ba iha boa governasaun estadu ninian. Intermus, administrativu no polítika ba investigasaun kriminalidade nian.
Jornalista : Domingos Piedade Freitas
Editór : Francisco Simões
