DILI, 01 outubru 2019 (TATOLI) – Iha audiénsia julgamentu ba kazu agresaun fíziku, violénsia doméstika no arma branka, ohin, iha Tribunal Distritál Dili, Juiza ba prosesu, Maria Solana, akonsella arguido sira atu hanoin ho sira nia futuru molok envolve iha kazu krime no kazu seluk ne’ebé prejudika sira nia futuru.
Ba joven na’in tolu ne’ebé sai arguido tanba halo ofensa integridade fízika simples ho kondisaun lanu baku vítima too balun baixa iha ospitál atu hakribi sira nia hahalok ona hodi hanoin ba sira nia futuru.
“Ha’u hanoin hahalok ne’e taka dalan ba imi joven sira nia futuru atu hetan serbisu, tanba laiha ona komportamentu ne’ebé di’ak,” hateten Juiza Maria Solana.
Nia apela ba joven sira seluk atu aproveita tempu ho di’ak hodi estuda no aproveita inan-aman nia sakrifisiu hodi buka bukae ba futuru. Tanba ne’e, molok halo asaun krime no envolve iha organizasaun ilegál ruma tenke tetu ho didi’ak no tetu ho futuru.
Iha biban seluk, juis Antonino Helder preokupa ho joven idade 17 too 28 ne’ebé mak maioria komete aktu kriminál hanesan arma branka, razaun tanba maioria la remata eskola Ensinu Báziku no Ensino Pre- Sekundária.
Konsekuénsia husi sira nia ignorante mak maioria lahatene lee no hakerek, kuandu mai julga iha tribunal barak haluha nia identidade loloos mak hanesan haluha data moris, haluha naran aldeia, suku no seluk-seluk tan.
“Joven sira agora barak mak lakohi aproveita edukasaun ho didi’ak, hakarak envolve-an iha aktu kriminál, mas sira la hatene katak envolvimentu sira nian bele fo implikasaun negativa ba sira nia futuru,” hateten Juis Antonino Helder.
Juis ne’e dehan, tuir loloos hanesan joven tenke kontribui ba dezenvolvimentu liu husi partisipasaun ba edukasaun di’ak, seguransa di’ak hodi dezenvolve nasaun ne’e iha futuru.
Nia hatutan, kuandu joven sira lakohi kontribui, hakarak envolve-an iha aktu kriminaís, dalan ikus mak sei ba deskansa iha prizaun no integridade pesoál la di’ak iha vida tomak tanba sai ema kriminozu iha nia rain rasik.
Jornalista : Domingos Piedade Freitas
Editór : Francisco Simões
