VENILALE, 29 outubru 2019 (TATOLI)-Lia na’in Aldeia Uai-oli, uma lisan Uatu-missa, Suku Bado-hoo, João das Neves, husu ba Governu liuhosi Ministériu Reforma Lejizlativu no asuntu Parlamentár (MRLAP) atu elabora lei formal ida hodi fó kompeténsia ba lia na’in sira rezolve disputa sira iha suku no aldeia laran.
Notísia Relevante : Administradór Postu Venilale Agradese MRLAP
Aldeia Uai-oli, uma lisan Uatu-missa, Suku Bado-hoo, pertensia ba Postu Administrativu Venilale, Munisípiu Baucau, ne’ebé durante ne’e ninia autoridade sira ho lia na’in sira uza lei kostumeiru rezolve ona disputa sira entre komunidade iha suku ho aldeia laran, maibé enfrenta difikuldade tanba la iha baze legal atu bele deside sansaun ba ema ne’ebé komete disputa.
“Ami hakarak iha lei ruma hodi garantia lia nain sira hodi tesi lia tanba iha mós nia impaktu no risku ba ami lia nain no autoridade suku sira,” afirma João das Neves, ohin, iha ámbitu konsultasaun públiku Lei Kostumeiru no Justisa Tradisionál hosi ekipa apoiu jurídiku MRLAP nian ba komunidade no autoridade Venilale iha salaun Postu Administrativu Venilale, Munisípiu Baucau.
Xefe Suku Bercoli, Vincente de Sousa Boavida, husu para Governu mantein no haforsa nafatin Lei Kostumeiru ho Justisa Tradisionál ne’ebé tempu bei’ala sira nian implementa ona iha sira nia suku laran.
Jornalista : Osória Marques
Editór : Francisco Simões
