DILI, 21 agostu 2020 (TATOLI)-Prezidente Parlamentu Nasionál, Aniceto Guterres, hateten sei ko’alia ho Governu kona-ba ejizensia Aliansa Universitáriu Timor-Leste (AUTL), ne’ebé ejize Governu atu fó subsídiu no aplikasaun propinas gratuita durante implementasaun Estadu Emerjénsia.
Aniceto Guterres, hato’o asuntu ne’e bainhira halo enkontru ho Delegasaun AUTL iha Parlamentu Nasionál, sesta ne’e.
Notísia Relevante :AUTL ejize Governu kria fali dekretu-lei foun
Durante sorumutu ne’e, PPN husu ba AUTL atu aprezenta dadus ezaktu kona-ba estudante universitáriu na’in hira maka laiha kbi’it selu propinas nune’e bele relata ba Governu.
“Ha’u hakarak hetan reposta ohin kedas husi ita bo’ot sira kona-ba estudante na’in hira mak hakarak hetan pagamentu ba propinas atu nune’e labele akontese hanesan falsifikasaun dokumentu iha fulan hirak liubá,” dehan Aniceito Guterres.
Maski nune’e, Prezidente Parlamentu Nasionál ne’e la promete ba AUTL atu hetan ona subsídiu ne’e iha tempu badak tanba sei ko’alia ho parte Governu liliu Ministériu Ensinu Superiór Siénsia no Kultura (MESSK).
“Ha’u husu dadus ejaktu ne’e atu antisipa ami-nia hasoru malu ho Governu ne’e mak to’o iha desizaun ruma karik Governu hakarak kumpre buat rua tuir ita bo’ot sira nia ejizensia ne’e bele iha ona dadus ida klaru,” tenik tan.
Iha fatin hanesan Portavóz AUTL, Paul dos Santos, hateten AUTL garante sei la falsifika dokumentu tanba dadus sei hetan husi Instutuisaun Ensinu Superiór idaidak iha Timor-Leste.
Notísia Relevante :MESSK ho AUTL seidauk hetan solusaun
Jornalista : Tomé Amado
Editór : Agapito dos Santos
