DILI, 01 setembru 2020 (TATOLI)-Klínika Bairru-Pité durante fulan-agostu liubá rejista ona pasiente ho moras ipertensaun no diabetes hamutuk 200-resin.
Jestór klinika Bairru-Pite, Inácio dos Santos, hateten pasiente hirak ne’e kada fulan tenki halo tratamentu iha Klínika refere.
Notísia Relevante :Klínika Bairru Pité Kontinua Rejista Pasiente TBC
”Diabetes ho ipertesanun ne’e nia impaktu mak ema sira han hahán ne’ebé mak kímika tanba ita Timor uluk seidauk ukun aan ne’e ita han hahan orgániku hanesan aifarina, talas maibé depois ita ukun aan ema barak mak konsumu hahán importasaun,” dehan nia iha Klínika Bairru-Pité, segunda (31/08).
Kada loron, Klínika ne’ebé funda husi Doutór Matebian Daniel Murphy, tenki rejista pasiente ho moras ipertensaun no diabetes ho ema na’in rua ba leten.
Tuir nia katak moras ipertensaun maioria afeta ba ema idade boot, no idade produtivu sira ho tinan 30 ba leten mós hetan.
“Uluk ne’e ema ne’ebé hetan ipertensaun barak ne’e idade avansadu hanesan 50 ba leten kauza husi idade maibé agora lae tanba agora ita konsumu hahan ne’ebé la saudavel no liu liu han sira ne’ebé mak mai husi liur entaun sira mós fo kontribuisaun maka’as haree mós ba ita-nia estilu moris,” dehan nia.
Notísia Relevante :Klínika Bairru-Pité Rejista Kazu Má-Nutrisaun Maioria ba Labarik
Jornalista : Felicidade Ximenes
Editór : Agapito dos Santos
