MANATUTO, 15 dezembru 2020 (TATOLI)—Ministru Asuntu Parlamentár no Komunikasuan Sosiál (MAPKOMS), Francisco Martins Jerónimo, hateten iha 2021 ne’e MAPKOMS sei koordena ho Sentru Formasaun Téknika Komunikasaun (CEFTEC-sigla portugés) atu fó formasaun ba jornalista sira iha munisípiu.
“Ha’u sujere ba sira atu iha 2021, ha’u garante sei realiza formasaun ba jornalista sira iha munisípiu. Se sira la hala’o mak ha’u rasik mak sei tún hodi dudu, tanba rádiu komunidade sira tenke tama ba porsaun ne’e. Kada jornalista rádiu komunidade nian tuir formasaun língua portugeza ba nível báziku iha Dili, hodi eleva liután sira-nia kapasidade no koñesementu. Atu nune’e, bele transmite notísia portugés ba sosiedade,” Francisco Martins Jerónimo hato’o ba jornalsita sira bainhira hala’o vizita ba Radíu Komunidade ILI WAI Manatuto, tersa ne’e.
Aleinde ida-ne’e, governante ne’e hateten, hafoin ramata tiha sira-nia formasaun kona-ba língua ne’e, planu sei fó tan teste ba jornalista sira-ne’ebé iha kapasidade hodi ba kontinua tuir formasaun kona-ba língua.
Nia informa, antes nia mai vizita Rádiu Komunidade ILI-WAI Manatuto, ko’alia ona ho Diretór CEFTEC ne’ebé fó formasaun kona-ba área jornalista nian hanesan língua portugeza inklui ho formasaun ba media oficer ba nível munisípiu sira.
“Ha’u orienta ona katak iha 2021, CEFTEC sei foka uluk formasaun ba nível munisípiu sira tanba munisípiu sira ita presiza fó formasaun barak. Tanba durante ne’e formasaun ba jornalista nian iha de’it Dili laran,” nia dehan.
Nia hateten, atu nune’e ema ne’ebé hakarak sai jornalista bele aumenta sira-nia kapasidade oinsá atu hakerek notísia hodi transmite ba leitór sira. Ida-ne’e, tuir nia, depois mak halo planu no programa ida, nune’e bele responde nesesidade Rádiu Komunidade ILI WAI Manatuto no ba jornalista sira.
“Tanba ne’e mak, ohin, ha’u mai vizita atu hatene di’ak liután kona-ba Rádiu komunidade ILI WAI Manatuto nia kondisaun no mós parte infra-estrutura nian inklui ho subvensaun hotu. Ha’u toma nota no fila ba mak haree,” nia dehan.
Durante hala’o sorumutu ho jerente no jornalista sira iha Rádiu komunidade ILI WAI Manatuto ne’e, nia parte hato’o agradese ba Prezidente Rádiu Komunidade ILI WAI Manatuto ho ninia konselleiru, jerente ho mós jornalista sira, tanba bele simu nia hodi vizita sira.
Governante ne’e haktuir, vizita ne’ebé MAPKOMS halo ne’e hanesan oportunidade atu hasoru malu diretamente ho sira hodi bele hatene sira-nia problema, liuliu bele mós haree saida mak sira projeta ba sira-nia radíu ne’e rasik iha futuru.
Durante hala’o vizita ne’e, jerente Rádiu komunidade ILI WAI Manatuto mós rekomenda ba MAPKOMS kona-ba sira-nia situasaun hanesan problema subvensaun, liuliu problema infraestrutura rádiu ne’e nian.
“Problema ne’ebé sira enfrenta, relasiona ho subvensaun, infraestrutura, relasaun ho sira-nia situasaun rasik, hau toma nota. Ha’u ba haree fila fali, bele halo programa ne’ebe di’ak atu responde ba saida mak sira ejize,” nia dehan.
Iha fatin hanesan, Prezidente Rádiu Komunidade ILI WAI Manatuto, António da Silva hatete, nia parte fo agradesimentu ba Ministru Asuntu Parlamentár no Komunikasaun Sosiál, tanba bele hola pozisaun hodi hamriik iha sira-nia oin atu bele haree sira-nia kondisaun real.
Nia husu atu MAPKOMS bele haree kestaun ne’ebé sira hasoru, hanesan problema subvensun inklui mós infraesturtura iha radíu ne’e nian. Kona-ba subvensun ne’e, nia esplika, bainbain Gvernu fó apoiu subvensaun ba radíu komunidade sira-ne’e ba tinan ida-nian maibé iha tinan 2020 ne’e Governu fó apoiu fulan haat nian de’it.
Jornalista: Osória Marques
Editór: Cancio Ximenes
