LIQUIÇA, 26 abríl 2021 (TATOLI) – Administradór Munisipiu Liquiça, Domingos da Conceição dos Santos, hateten ezekusaun Orsamentu Jerál Estadu (OJE) 2021 ba Munisípiu Liquiça ho montante millaun ida-resin nian foin atinje 16%.
“Ezekusaun OJE 2021 foin atinje 16%, hahú hosi saláriu vensimentu, transferénsia públiku no bens servisu Administradór Domingos da Conceição dos Santos, informa ba Agência Tatoli iha Liquiça, segunda ne’e.
Nia dehan, kapitál menór sei iha prosesu aprovizionamentu hodi sosa motorizada no ekipamentu balu hodi fasilita servisu administrasaun nian.
Kona-ba kapitál dezenvolvimentu seidauk ezekuta no sei iha prosesu nia laran no iha kapitál dezenvolvimentu nian iha projetu tolu mak Munisípiu Liquiça sei ezekuta mak hanesan, rezidénsia ba Administradór Munisípiu, edifísiu Administrasaun Postu Bazartete no moru ba Administrasaun Postu Maubara nian.
“Konkursu públiku lao ona, hein de’it kompañia-sira kompleta dokumentu balun atu ami fó sai kompañia sira manan na’in,” nia relata.
Jornalista : Hortencio Sanchez
Editór : Francisco Simões
