LIQUIÇA, 17 maiu 2021 (TATOLI) – Xefe Suku Darulete, Postu Administrativu Liquiça Vila, Munisípiu Liquiça, Tarciso dos Santos, informa populasaun Suku Darulete simu hotu ona Cesta Bázika.
Notísia Relevante : Suku haat iha Liquiçá Vila seidauk simu Cesta Bázika
Nia dehan, total populasaun ne’ebé sai benefisiáriu iha Suku Darulete hamutuk 2.426 hosi total Xefe família 521.
“Sira simu hotu ona sasán ne’ebé fahe so ema na’in-11 de’it mak labele simu tanba sira balu hela iha Dili no Manatuto,” Xefe Suku Darulete, Tarciso dos Santos, hateten ba Agência Tatoli foin lalais ne’e.
Suku Darlete kompostu hosi aldeia haat mak hanesan, Lebuae, Caileli, Manufatea no Carulema no kompañia distribuidór Cesta Báziku mak Green Motain. Sasán ne’ebé populasaun simu iha programa Cesta Báziku ne’e, hanesan foos, manu-tolun, mina no nesesidade báziku seluk tan.
Iha sorin seluk, benefisiáriu Marcos dos Santos hateten, kontente tanba Governu bele realiza duni promesa hodi ajuda povu iha situasaun estadu emerjénsia ho programa distribuisaun Cesta Bázika.
“Agradese ba ita-nia Governu bele realiza duni sira-nia promesa hodi fahe ai-han ba povu, maske kuantidade natoon, maibé bele ajuda povu iha situasaun difisil ho pandemia COVID-19,” Marcos dos Santo hateten.
Jornalista : Hortencio Sanchez
Editór : Francisco Simões
