COVALIMA, 08 juñu 2021 (TATOLI)- Populasaun hamutuk 1.065 iha Postu Administrativu Suai Vila, Munisípiu Covalima, asesu bee-moos seidauk normál tanba sira tenke asesu loron-tolu kada semana iha oras-rua nia-laran de’it.
Notísia Relevante : 2020, idózus 6.067 iha Covalima sai benefisiáriu ba subsídiu Governu
“Ami aplika oráriu fornesimentu bee-moos ne’e ba komunidade tanba ita-nia bee-matan nia grafitasaun iha juñu to’o agostu, kada tinan, sempre menus no bee-matan balun maran iha tempu sira hanesan ne’e,” Tome Geraldo Belo, funsionáriu Bee Timor-Leste, Empreza Públiku (BTL.EP) iha Munisípiu Covalima, informa ba Agência Tatoli, tersa ne’e.
BTL.EP iha Munisípiu Covalima trasa ona planu atu oinsá maka mellora poténsia bee-moos iha Covalima atu bele fornese mós ba komunidade área urbana. Tanba dadus estatístika ne’ebé iha hatudu katak komunidade Suku Camanasa, Suai Loro ho Debos, seidauk asesu bee-moos.
Nia dehan, sira-nia parte mós sei menus tebes rekursu umanus no ekipamentu atu oinsá maka halo atendimentu ba fornesimentu bee-moos ba komunidade ho efikásia no efisiénsia.
Funsionáriu BTL.EP iha Munisípiu Covalima hamutuk na’in-25 no hosi númeru ne’e, na’in-neen (6) destaka iha postu administrativu.
Jornalista : Celestina Teles
Editór : Francisco Simões
