OÉ-CUSSE, 11 Juñu 2021 (TATOLI)—Xefe suku Taiboko, postu administrativu Pante Makasar, Joaquin Tafin, agradese ba VIII Guvernu Konstitusionál tanba kria programa cesta bázika ne’ebé bele tulun no hamenus komunidade nia sofrimentu iha ámbitu estadu emerjensia no serka sanitária.
Notísia Relevante: Governu prevee millaun $4 ba implementasaun Cesta Bázika iha RAEOA
“Ha’u nu’udar xefe suku kontente no agradese ba VIII Governu nia programa di’ak liuhosi cesta bázika ida-ne’e apoiu no tulun tebe-tebes ha’u-nia komunidade nia sofrimentu hodi sustenta sira-nia moris,” Joaquim Tafin informa ba Agência TATOLI, via telefónika, sesta ne’e.
Líder komunitária ne’e hateten, nu’udar sidadaun iha obrigasaun tenke simu saida mak Guvernu oferese tanba programa cesta bázika ne’e nu’udár asaun tulun komunidade iha ámbitu situasaun Estadu Emerjénsia no serka sanitária
Distribuisaun cesta bázika ne’e tulun tebes komunidade tanba dezastre naturál ne’ebé akontese iha 04 abríl ne’e, estraga komunidade nia toos no natar balun ne’ebé afeta tebes ba komunidade nia moris tanba sira labele halo kolleta.
“Iha distribuisaun cesta bázika ne’e ami kontribui no koopera ho di’ak. Ita tenke respeitu apoiu ne’ebé Governu oferese. Tanba, liga ho dezastre naturál ne’ebé akontese iha o4 abril foin lalais ne’e, afeta mós ba ha’u-nia komunidade nia toos tanba lakon ai-han. Tanba mumentu ne’ebá komunidade sedauk kolleta, entaun programa ida-ne’e ami agradese tebes tanba bele sustenta sira-nia nesesidade uma laran,” nia dehan.
Notísia Relevante: Semana oin, Governu lansa Programa Cesta Bázika iha RAEOA
Nia informa, totál benefísiáriu ne’ebé simu ona nesesidade bázika iha programa cesta bázika iha suku Taiboko ne’e hamutuk 6705, ne’ebé kompostu hosi aldeia haat (4) mak aldeia Hau-Boni, Nemun, Ulas no aldeia Maquelab.
Hosi aldeia haat ne’e, aldeia tolu (3) mak simu ona nesesidade bázika no falta aldeia ida mak sedauk simu ho totál abitante hamutuk 2052, ho reklamante hamutuk 114 tanba dadus ne’e bazéa ba 08 maiu 2020 entaun benefisiáriu nia naran balun sedauk tama iha lista.
Tuir diploma ministeriál konjuntu númeru 38/2020, 26 outubru, produtu ne’ebé tama lista projetu cesta bázika mak produtu alimentár kompostu hosi foos, batar, koto/fore, amendoin, sorgum dulas, kafé, masin, fehuk europa, susu been, masin midar, manu, manu tolun, mina tein, mina nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo-metan, modo-mutin, no modo seluk tán.
Enkuantu ba produtu ijiene mak sabaun, álkohol jel, deterjente, eskova nehan, no pasta nehan. Programa cesta bázika fixa membru ida-idak agregadu famíliár sei hetan produtu ai-han ho valor $25 ba fulan rua nian.
Notísia Relevante: Governu altera dekretu-lei atribuisaun Cesta Bázika
Jornalista: Abilio Elo Nini
Editór: Cancio Ximenes
