BOBONARO, 18 juñu 2021 (TATOLI)—Hahú hosi 14 to’o 17 juñu, sidadaun munisípiu Bobonaro ho idade 60 ba leten no mós ema ho komorbilidade hamutuk na’in 2.854, simu vasina AstraZenaca doze dahuluk ho doze daruak.
Parte imunizasaun munisipál rejista iha 14 juñu hamutuk ema na’in 617, iha 15 juñu rejista ema na’in 771, 16 juñu na’in 619 no 17 juñu hamutuk na’in 847.
Notísia relevante:Autoridade lokál Bobonaro apoia programa vasina COVID-19
“Númeru ne’e, rejista hosi postu vasinasaun ne’ebé establese iha munisípiu ne’e,” Responsável Imunizasaun munisípiu Bobonaro, Júlio Ati-Buti, hateten ba jornalista Agência Tatoli, iha Diresaun Servisu Saúde Munisípiu Bobonaro, Soso, sesta ne’e.
Júlio Ati-Buti observa katak, durante loron haat ne’e komunidade barak maka entuziasmu tebes atu simu vasina, pesoál saúde-sira kontinua fahe informasaun iha terrenu.
Tuir planu, sidadaun ne’ebé atu kompleta vasina ba doze daruak-nian, sei oferese ba ema hamutuk na’in 1.178.
Tarjetu ne’ebé sei oferese doze dahuluk faze daruak-nian, ba instituisaun-sira hamutuk ema na’in 4.199 no ba populasaun ho idade 60 ba leten inklui komorbilidade hamutuk 10.236, iha munisípiu ne’e.
Jornalista: Sérgio da Cruz
Editór: Cipriano Colo
