OÉ-CUSSE, 23 juñu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA) liu-hosi Sekretáriu Rejionál Asuntu Agríkultura servisu hamutuk ho Sekretáriu Rejionál Asuntu Teras Propriedade no Ordenamentu Teritoriu no Kadastru identifika ona rai ektare 12.140 iha Pante Makasar atu sai área protejida
Sekretáriu Rejionál Asuntu Agríkultura, José Eta, hateten atividade levantamentu mapeamentu área protejida (hutan lindung) monte Cutete durante fulan ida (06 abríl-01 juñu) ne’e, konsege kobre ona área protejida sira ne’ebé lokaliza iha suku lima (5).
“Ita-nia ekipa halo ona identifikasaun no nia rezultadu medida levantamentu área protejida monte Cutete ho totál ektare 12.140. Ita konsege kobre ona área protejida sira iha suku lima (5) mak hanesan suku Nipani, suku Costa, suku Lalisuk, suku Cunha no suku Bobocase. Iha área sira-ne’e, komunidade labele halo atividade agrikultura no halo rezidénsia,” Jose Eta informa ba Agênsia TATOLI, via telefónika, kuarta ne’e.
Nia fundamenta, atividade identifikasaun mapeamentu área protejida ne’e hala’o bazea ba dekretu lei no.5/2016 kona-bá sistema nasionál área protejida.
“Iha RAEOA, ita iha fatin neen (6) kategoria ba área protejida ho ninia medida volume ektare 36.600 ne’ebé lokaliza iha monte Cutete no tuir lolos iha ninia dekretu iha ektare 13.300. Maibé depois ita halo peskiza liu-hosi levantamentu ne’e, ita hetan ektare 12.140,” nia dehan.
Iha parte seluk, Sekretáriu Rejionál Asuntu Teras Propriedade no Ordenamentu Teritorio no Kadastru, Antonio Hermenegildo da Costa, hateten levantamentu mapamentu iha RAEOA halo ona no iha tempu badak ekipa teknika hosi Teras Propriedade sei monta kuadru avizu ba fatin identifikasaun sira.
“Área protejida sira-ne’e tenke proteje hanesan iha Cutete pertense ba suku Costa, Usmetan iha suku Taiboko, Tep-ana, Tepa-Naek iha suku Bene-Ufe no fatin seluktán. Tuir planu, liu-hosi OJE tinan ne’e, ita sei prevee tan osan nune’e ita bele tau kuadru avizu ba fatin sira-ne’ebé halo ona levantamentu,” nia hateten.
Jornalista : Abilio Elo Nini
Editor : Cancio Ximenes
