DILI, 06 jullu 2021 (TATOLI)-Diretór Sekretariadu Tékniku Administrasaun Eleitorál (STAE) Munisípiu Lautem, Gergio Belmonte, informa hosi janeiru to’o juñu 2021, Munisípiu Lautem rejistu eleitór foun hamutuk 1.096.
Gergio Belmonte ba Agência Tatoli liuhosi telefónika, tersa ne’e, hateten sira mós halo atendimentu ba eleitór tuan ne’ebé atualiza fali ne’e hamutuk 712.
Eleitór atualizadu ne’e númeru 712 ba kategoria hanesan, troka data hamutuk 153, lakon 198, tohar iha 269, muda hela fatin 65.
Dadus provizóriu hosi tinan kotuk, agostu 2020, eleitór-sira hamutuk 44.000 tuir publikasaun Jornál Repúblika 2020 no ba 2021 nian seidauk bele publika hodi hein faze final iha dezembru 2021.
Nia dehan, númeru eleitorál mate iha Lautem ba tinan 2020, ema na’in-70 no tinan 2021 maske ema mate iha maibé lideransa komunitáriu seidauk submete ba STAE Munisipál.
Jornalista : Arminda Fonseca
Editór : Francisco Simões
