BOBONARO, 10 jullu 2021 (TATOLI)-Prezidénsia Repúblika liuhosi Xefe Casa Civil, Francisco de Vasconselhos, sábadu ne’e, iha Aldeia Solugolo, Suku Holsa, Postu Administrativu Maliana, Munisípiu Bobonaro, entrega uma kbiit-laek ba inan-faluk Francisca de Jesus.
Iha serimónia entrega uma ne’e hetan bensaun hosi Pároku Santa Kruz Maliana, Pe. Valerio Gumão.
“Ha’u lori kumprimentus domin no hakuak boot hosi Prezidente Repúblika ho nia-espoza, bá ama Francisca de Jesus no bá autoridade sira hotu. Prezidente Repúblika labele mai, maibé sira hato’o mensajen liuhosi ha’u atu hato’o sira-nia kumprimentus no hakuak boot bá imi hotu,” Francisco de Vasconselhos haktuir mensajen Prezidente Repúblika.
Francisco klarifika katak konstrusaun uma ne’e simples, maibé ne’e hanesan símbolu domin hosi Prezidente Repúblika ho nia espoza ba inan-faluk Francisca de Jesus, atu la bele sente moris mesak.
Husu Timoroan hotu atu halo solidariedade ba ema ne’ebé presiza tulun iha momentu ne’ebé nia laiha kbiit, tamba uma mak sai sentru atu halibur família, viziñu no ema ne’ebé husi fatin seluk ne’ebé la koñese.
Iha serimónia ne’e, prezidente Autoridade Munisípiu Bobonaro, Ernesto de Oliveira Barreto, hato’o agradese ba Prezidente Repúblika tanba bele hakmaan nia populasaun sira-nia susar no husu bá autoridade lokál sira tau matan nafatin ba inan-faluk Francisca de Jesus.
Laurinda de Jesus, lori família inan-faluk Francisca de Jesus nian hato’o agradese ba Prezidente Repúblika ne’ebé hari ona uma dignu ba inan-faluk Francisca de Jesus no hatudu katak inan-faluk ne’e la mesak.
“Uluk tempu udan bokon muda hosi fatin ida ba fatin seluk, maibé agora Estadu halo mahon ona ba ha’u nia inan bele hela ho di’ak,” Laurinda de Jesus hateten.
Fundus ba konstrusaun uma ne’e mai hosi orsamentu jerál estadu (OGE) liuhosi transferénsia publika ho montante $3.000, ne’ebé kada tinan Prezidénsia Repúblika husu atu apoia nesesidade nia povu.
Uma Tipu semi permanente ne’e ho nia medida 6×7; kuartu ida, sala rua (2) kompletu ho hariis-fatin.
Uma ne’e konstrui voluntáriamente hosi viziñu, grupu Loriku adventure no komunidade suku Holsa durante fulan ida, hosi janeiru to’o marsu 2021.
Inan-faluk Francisca de Jesus, idade tinan 90, iha oan na’in hitu, kompostu hosi na’i-lima fila ona ba Maromak Nia Kadun Santu no feto na’in rua mak sei moris.
Jornalista : Sérgio da Cruz
Editór : Francisco Simões
